“Rossiyadagi bo‘layotgan saylov jarayonlari o‘ziga xos yangi tendensiyalarni keltirib chiqaradi” — Sayfiddin Jo‘rayev

Bugun Rossiyada prezident saylovlari bo‘lib o‘tmoqda. Shu munosabat bilan “Daryo” siyosatshunos Sayfiddin Jo‘rayevga murojaat qilib, Rossiyadagi saylovlar bo‘yicha fikr so‘radi.

“Rossiyadagi bu yilgi saylovlarda muammolik holatlar ko‘p, oldingilarga nisbatan unchalik silliq o‘tmayotganini ko‘rish mumkin. Birinchidan saylovda oppozitsiya ishtirok etmayapti. Rossiya hukumatiga qarshi, ayniqsa, Putinga qarshi bo‘lgan Navalniyning o‘limi bilan bog‘liq bo‘lgan holatlarni hisobga keltirish kerak.

Shuni aytib o‘tish kerakki, Navalniy o‘lgandan keyin Rossiya jamiyatida uni qo‘llovchilar ko‘pligini biz ko‘rdik. Juda ko‘pchilik ma’lum darajada siyosiy hokimiyatda yangi kuchlar kelish tarafdori. Boshqa bir jihatdan ko‘radigan bo‘lsak, yana Rossiyaga qarshi bir qancha sanksiyalar e’lon qilingan. Bundan tashqari, Rossiya Ukraina mojarosi ham chuqurlashib bormoqda.

Mana bu jarayonlar ham albatta saylovlarga ta’sir omili sifatida paydo bo‘lyapti. Uchinchi jihatini aytib o‘tish kerakki, Rossiyaga Ukrainadagi urush tufayli haddan tashqari ko‘p sanksiyalar e‘lon qilingan. Rossiya bu sanksiyalar orqali yangidan yangi zarbalar olyapti desak ham bo‘ladi. Shu nuqtai nazardan qaraydigan bo‘lsak, demakki shu sanksiyalarini chetlab o‘tish uchun ma‘lum darajada iqtisodda yanada takomillashtirish uchun saylovlarda albatta Putinning yutib chiqishi to‘g‘ri deb qarash mumkin bo‘ladi. Chunki unga teng keladigan boshqa nomzod yo‘q.

Bilamizki Rossiya hozirgi kunda butunlay deyarli o‘zini siyosatini Sharq tomonga burdi. Mana shu saylov orqali demak boshqa davlatlarga, jumladan, O‘zbekistonga nisbatan munosabatlarini qanday bo‘lishiyam yaqin yillar ichida belgilab olinadi. Buni amalga oshirish saylovda yutib chiqadigan nomzod bilan bog‘liq bo‘ladi.

Rossiya—Ukraina mojarosi natijasida Rossiyaning Osiyo tomonga burilishi ma‘lum darajada bu yerdagi mamlakatlar bilan aloqalarning kengaytirish yam yangi bo‘lgan yo‘nalishlarni beradi. Faqat bir vaqtning o‘zida ham G‘arb davlatlari bilan ham, ham Rossiya bilan, ham Xitoy bilan boshqa shunga o‘xshash boshqa davlatlar bilan ko‘p qirrali hamkorligimizni yanada chuqurlashtirishimiz kerak bo‘ladi.

Bu albatta hozirgi kuchlar nisbati o‘zgarayotgan yangi xalqaro tartibotlar shakllanayotgan sharoitda juda muhimdir. Demak xulosa qilib aytishimiz mumkinki Rossiyadagi bo‘layotgan saylov jarayonlari o‘ziga xos yangi tendensiyalarni keltirib chiqaradi va mana shu yangi tendensiyalar ichida O‘zbekiston Rossiya munosabatlarining takomillashishi muhim ahamiyatga ega bo‘ladi”, — deydi Sayfiddin Jo‘rayev.