Қашқадарёда дарёдан қум-шағал ноқонуний қазиб олиниши бўйича икки ҳолат аниқланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар берди.
Бу прокуратура органлари, Экология вазирлигининг “Хавфсиз дарё бошқармаси” давлат муассасаси ҳамда Қашқадарё вилояти экология бошқармаси томонидан Қарши тумани ҳудудидан оқиб ўтувчи Қашқадарё дарёсида ўтказилган рейд давомида аниқланган.
Рейд давомида маълум бўлишича, дарё қирғоғидаги муҳофаза минтақасида фуқаро Ф.К. ноқонуний тарзда табиий қум маҳсулотларини ўз эҳтиёжлари учун маълум бир ҳақ эвазига қазиб юрган. Бунинг учун 1 дона Doosan Solar 300LC-V русумли экскаватор ва “КамАЗ” юк машинасидан фойдаланган.
Оқибатда табиатга 19,4 миллиард сўмдан ортиқ зарар етказилган.
Қайд этилишича, фуқаро Ф.К. қум-шағални ноқонуний қазигани учун аввал ҳам бир неча марта жавобгарликка тортилган, аммо бундан тегишли хулоса чиқармаган.
Шунингдек, мазкур ҳудудда фуқаро Р.Қ. томонидан 1 дона экскаватор, Shacman ва “КамАЗ” юк машиналари ёрдамида табиий қум маҳсулоти ноқонуний тарзда қазиб олинаётгани аниқланди. Табиатга етказилган зарар миқдори 22,1 миллиард сўмдан ошган.
Ҳолатга ҳуқуқий баҳо бериш ва айбдорларга нисбатан қонуний чора кўришни таъминлаш мақсадида тегишли ҳужжатлар Бош прокуратурага юборилган. Техника воситалари жарима майдонига жойлаштирилган.
Маълумот учун, Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанидаги норуда материалларни қазиб олишга 2024 йил 1 майдан муддатсиз мораторий жорий қилинган.
Изоҳ (0)