Janubiy Koreyaning ommabop SkyLifeTV telekompaniyasining ENA teledasturi va ko‘plab koreys seriallarida surʼatga tushgan mashhur aktyorlaridan iborat ijodiy guruh O‘zbekistonning xorijiy sayyohlar ko‘p tashrif buyuradigan joylari haqida ko‘rsatuv olishni rejalashtirmoqda. Bu haqda “Dunyo” AA xabar berdi.
Maʼlum qilinishicha, Janubiy Koreya telekompaniyasining suratga olish guruhi O‘zbekistonga ijodiy safari davomida Toshkent, Samarqand va Buxoro shaharlarida bo‘ladi.
Safar chog‘ida mamlakatning sayyohlik imkoniyatlari, madaniy va tarixiy joylari, dam olish maskanlari, gastronomiyasi, hunarmandchilik anʼanalari haqidagi maxsus ko‘rsatuv suratga olinadi.
“Ushbu dastur Janubiy Koreya aholisi uchun qiziqarli bo‘ladi. Undan ko‘zlangan asosiy maqsad – O‘zbekistonning boy madaniyati, tarixi va turizm salohiyatini koreyaliklar sevib tomosha qiladigan mashhur aktyorlar yordamida ochib berishdan iborat. Bu o‘z navbatida, yurtingizga sayyohlar sonining ko‘payishiga xizmat qiladi, deb umid qilaman” – degan ENA teledasturi direktori Pak Chong Xon.
Izoh (0)