Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi majlisida “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid Davlat dasturi loyihasi muhokama qilindi. Bu haqda yuqori palata matbuot xizmati xabar berdi.
Muhokamalar davomida Davlat dasturi loyihasida yoshlar va biznesni qo‘llab-quvvatlash, ijtimoiy-iqtisodiy rivojlantirishni takomillashtirish, davlat boshqaruvi, sud-huquq tizimi, xavfsizlik va tashqi siyosat, suv resurslarini oqilona boshqarish, atrof muhitni muhofaza qilishga qaratilgan islohotlarni amalga oshirish belgilangani alohida taʼkidlandi. Senatorlar Qo‘mitaning maqsad va vazifalaridan kelib chiqqan holda, dastur loyihasida tashqi siyosat, xorijiy investitsiyalarni jalb etish va turizmni rivojlantirish bilan bog‘liq vazifalarni atroflicha tahlil qildi.
Jumladan, joriy yilda tashqi va ichki turizmni rivojlantirish uchun shart-sharoit yaratish, to‘rtta yirik turizm klasterini shakllantirish orqali xorijiy sayyohlarning umumiy sonini 10,5 millionga yetkazish bo‘yicha keng ko‘lamli vazifani amalga oshirish zarurligi taʼkidlandi. Bundan tashqari, Davlat dasturida tashqi iqtisodiy va investitsiya faoliyatining qonunchilik bazasini yanada takomillashtirish, umumiy qiymati 18 mlrd dollarlik 309 ta investitsiya loyihasini ishga tushirish ko‘zda tutilgan.
O‘zbekiston fuqarolarining xorijdagi huquq va manfaatlarini himoya qilishga, jumladan, konsullik xizmatlari ko‘rsatishni takomillashtirishga alohida eʼtibor qaratildi. Muhokama chog‘ida senatorlar va mahalliy vakillik organlari deputatlari Davlat dasturida belgilangan vazifalarni amalga oshirishda tegishli vazirlik va idoralar bilan yaqindan hamkorlik qilishga tayyor ekani alohida taʼkidlandi.
Muhokama yakunlari bo‘yicha Davlat dasturi loyihasi bo‘yicha qator taklif va tavsiyalar ishlab chiqildi.
Izoh (0)