Aholini daromadli qilish bo‘yicha Sayxunobod tajribasi butun O‘zbekistonda ommalashtiriladi

Shavkat Mirziyoyev 14-mart kuni Sirdaryoning Sayxunobod tumanidagi videoselektor yig‘ilishida aholini daromadli qilish bo‘yicha Sayxunobod tajribasi yo‘lga qo‘yilishini aytdi.

Yig‘ilishda davlat rahbari Sayxunobodda 17 mingta xonadonda tomorqani ishga solish, kichik sanoat va xizmatlarni yo‘lga qo‘yish orqali aholini daromadli qilish vazifasini qo‘ydi.

Mas’ullar 19 ta mahalla va 794 ta ko‘chani nomma-nom bo‘lib olib, bu yil tadbirkorlik uchun beriladigan 200 milliard so‘m hisobidan ularni har biriga texnik iqtisodiy asos ishlab chiqadi. Bunda, mahallani drayver yo‘nalishidan kelib chiqib, tumandagi 17 mingta xonadon kesimida tomorqada qancha, sanoatda qancha, savdo va xizmatlarda qancha aholi band bo‘lishi aniq ko‘rsatiladi.

Sayxunobodda ilk bor yangi tajriba qilinib, 19 ta mahallaning har biriga 1 tadan mini traktor, 4 tadan moto-kultivator olib berilgan. Endilikda har bir mahalladagi hokim yordamchisi “1 sotix tomorqadan kamida 1-2 million so‘m daromad” degan mezon asosida aholi uchun biznes reja ishlab chiqadi. Mahalladagi agronomlar bilan birga olib berilgan texnikalar hisobidan tomorqa yerlarini haydash va ekin ekish xizmatlarini ko‘rsatadi.

Sayxunobod tajribasi butun respublikada ommalashtiriladi.

Prezident, shuningdek, Sayxunobodda va boshqa tumanlarda sotib olish tizimini yo‘lga qo‘yishni topshirdi. Shu maqsadda tumanda eksportga ko‘maklashuvchi korxona ochilib, ustaviga 1 milliard so‘m kiritiladi.

Bu korxona 4 ming xonadonga serhosil qovoq, mosh, loviya, rozmarin, brokkoli, timyan urug‘ini yetkazadi, yetishtirilgan mahsulotni sotib olib, eksport qiladi. Bundan tashqari, mahallada sotib olishni yo‘lga qo‘ygan eksportchi, ilg‘or tadbirkorlarga 300 million so‘mdan 1 milliard so‘mgacha grant beriladi.

Prezidentning ta’kidlashicha, Sayxunobodning eng katta zaxirasi ham, imkoniyati ham yer. Masalan, ushbu tuman aholi tomorqasi 20 sotixdan ortiq bo‘lgan 26 ta tumandan biri. Lekin buning 10 foizi ishlatilyapti, asosiy ekin beda bilan makka bo‘lib qolgan.

Tumandagi 19 ta mahallaning har birida istagi bor aholiga namunaviy intensiv bog‘ qilib beriladi. Shuningdek, xonadonlar kooperatsiya asosida eskportchi bilan bog‘lab beriladi, 2 ming tonnalik saqlash, saralash va qayta ishlash kompleksi tashkil etiladi.

Tumandagi 98 kilometr kanallar va drenaj tarmoqlari atrofidagi 100 gektar bo‘sh yerlar kooperatsiya asosida 500 ta xonadonga terak ekish uchun bo‘lib beriladi.