Shvetsiya o‘z hududida NATO qo‘shinlarini joylashtirishga ruxsat beradi, biroq tinchlik davrida alyansning doimiy harbiy bazalari yoki yadro qurollarini mamlakatda joylashtirishga qarshi.
NATOga a’zolik biror davlatni o‘z hududida yadro qurolini joylashtirishga majbur qilmaydi, dedi Shvetsiya tashqi ishlar vaziri Tobias Billstryom.
“Biz tinchlik davrida hududimizda yadro quroli mavjud bo‘lishi uchun hech qanday sabab ko‘rmayapmiz. Bu borada Norvegiya va Daniya yo‘lidan boramiz. Sovuq urush tugaganidan beri NATOning faqat uchta davlati — AQSH, Angliya va Fransiya yadro quroliga ega”, — dedi u.
Billstryomning qo‘shimcha qilishicha, Shvetsiya NATOga alyans yadroviy qurollarini joylashtirish bo‘yicha hech qanday shartlarsiz qo‘shilgan.
Bir kun avval, 11-mart kuni NATO bosh kotibi Yens Stolternberg alyans yadro quroliga ega ittifoqchilar sonini ko‘paytirish rejasi yo‘qligini aytgandi. Uning qo‘shimcha qilishicha, NATO Shvetsiyada yangi jangovar bo‘linmalarni joylashtirish niyatida emas.
Yaqinda NATOga a’zo bo‘lgan Finlyandiyaning prezidenti Aleksandra Stubba ham o‘z mamlakati uchun yadroviy tiyib turish kuchiga ega bo‘lish muhim ekanini aytgandi. Rossiya Tashqi ishlar vazirligi rasmiy vakili Mariya Zaxarova, agar Finlyandiya hududida AQSH yadro quroli paydo bo‘lsa, Yevropa xavfsizligiga putur yetishi haqida ogohlantirgandi.
Shvetsiya 7-mart kuni rasman NATOga qo‘shildi va alyansning 32-aʼzosi bo‘ldi. 11-mart kuni NATOning Bryusseldagi qarorgohi oldida mamlakat bayrog‘i ko‘tarildi.
Izoh (0)