Gaitida hokimiyatni egallab olgan qurolli to‘dalar talabiga binoan, mamlakat bosh vaziri Ariel Genri iste’foga chiqqanini ma’lum qildi. Bu haqda Euronews xabar berdi.
Hukumat rahbari o‘tish davri prezidentlik kengashi tuzilganidan so‘ng o‘z lavozimini tark etishi haqida gapirgan. U Puerto-Rikodagi nutqida uning samolyoti avvalroq chet elga tashrifidan so‘ng Port-o-Prens aeroportiga qo‘nishda to‘sqinlikka uchragani, o‘zi esa Gaiti tashqarisida qolib ketganini aytgan.
Ikki haftadirki, qurolli jinoiy guruhlar Gaiti poytaxti ko‘chalarini vayron qilmoqda. Ular bir nechta politsiya bo‘limlarini yoqib yuborishgan va 4000 dan ortiq mahbuslarni ozod qilishgan, ularning aksariyati jinoiy guruhlarga qo‘shilgan. Yuzlab mahalliy aholi halok bo‘lgan, 15 mingdan ortig‘i uylarini tark etishga majbur bo‘lgan edi.
11-mart kuni AQSH davlat kotibi Entoni Blinken Gaitidagi Keniya boshchiligidagi xalqaro tinchlikparvar missiyasi uchun 100 million dollar mablag‘ ajratilishini ma’lum qilgan. Vashington yana 33 million dollarni insonparvarlik yordami va “prezident kolleji” qurilishiga sarflaydi.
Gaitida deyarli o‘n yildan beri saylovlar bo‘lmagan, Ariel Genri ham saylanmagan. U 2021-yilda prezident Jovenel Moisega suiqasd qilinganidan so‘ng lavozimga kirishgan va tez orada saylov tashkil etishga va’da bergan. Biroq u saylov amalga oshirilmagan va doimiy ravishda kechiktirilgan.
BMT ma’lumotlariga ko‘ra, o‘tgan yil davomida mamlakatda 4700 dan ortiq odam o‘ldirilgan.
Izoh (0)