Eron prezidenti Ibrohim Raisiy ramazon oyining kirib kelishi munosabati bilan eʼlon qilgan nutqida musulmon xalqlari va ularning yetakchilarini tinchlikni targ‘ib qilishga va zolimlarga, xususan, sionistik rejimga qarshi turishga chaqirdi. Bu haqda IRNA nashri xabar berdi.
Prezident Raisiy o‘z bayonotida musulmonlar o‘rtasida tinchlik va birodarlikni targ‘ib qilish, shuningdek, maʼnaviyat va birdamlikni kengaytirish islom yetakchilari va hukumatlarining burchi ekanini taʼkidlagan. Birdamlikda harakat qilishga chaqirgan.
“Ushbu muborak oy barcha musulmonlar uchun, ayniqsa, sidqidildan qilingan duolar orqali qalbi va maʼnaviyatini nurga to‘ldirish, ilohiy taʼlimotlarga, xususan, muqaddas Qurʼonga amal qilib, o‘zlari va islom ummatini yuksaltirish uchun sharoit yaratish uchun bebaho imkoniyatdir”, — deya qo‘shimcha qilgan Ibrohim Raisiy.
Raisiy Falastinning ilohiy inoyat bilan ozod bo‘lishi, ishg‘ol qilingan Quddus va Al-Aqso masjidi islom olami quchog‘iga qaytishiga umid bildirdi. Ramazon oyi dunyo musulmonlari uchun birodarlik rishtalarini mustahkamlash oyi ekanini uqtirdi.
Izoh (0)