AQSHning BMTdagi sobiq elchisi va Janubiy Karolina shtatining sobiq gubernatori Nikki Xeyli bugun, 6-mart kuni prezidentlik poygasidagi ishtirokini to‘xtatayotganini e’lon qilishni rejalashtirmoqda. Bu haqda The Wall Street Journal manbalarga tayanib xabar berdi.
Kecha AQSHda Demokratik va Respublikachilar partiyalaridan nomzodlar uchun eng yirik boshlang‘ich saylovlar bo‘lib o‘tdi. Xeyli 15 shtatdan faqat bittasida — Vermontda g‘alaba qozondi.
The Wall Street Journal suhbatdoshlariga ko‘ra, Nikki Xeyli respublikachilarning praymerizdagi ishtirokini to‘xtatish haqidagi qarorini mahalliy vaqt bilan soat 10:00 da e’lon qiladi. Nashr manbalarining qayd etishicha, Xeyli xonim poyga ishtirokchilaridan birortasini ma’qullash niyatida emas. Biroq u yagona raqibi, sobiq AQSH prezidenti Donald Trampni uni qo‘llab-quvvatlagan saylovchilarning ovozini olishga chaqiradi.
Hafta boshida Nikki Xeyli ketma-ket to‘qqizta mag‘lubiyatdan so‘ng, AQSH poytaxti Vashingtonda bo‘lib o‘tgan respublikachilarning praymeriz saylovlarida birinchi g‘alabasini qo‘lga kiritdi. Super seshanba kuni u atigi 43 delegatning qo‘llab-quvvatlashiga erishdi. Respublikachilar partiyasining deyarli barcha boshlang‘ich saylovlarida g‘alaba qozongan uning raqibi Donald Tramp 276 delegatning ovoziga ega bo‘ldi. AQSHda prezidentlik saylovlari 2024-yil noyabrida bo‘lib o‘tadi.
Izoh (0)