АҚШнинг БМТдаги собиқ элчиси ва Жанубий Каролина штатининг собиқ губернатори Никки Хейли бугун, 6 март куни президентлик пойгасидаги иштирокини тўхтатаётганини эълон қилишни режалаштирмоқда. Бу ҳақда The Wall Street Journal манбаларга таяниб хабар берди.
Кеча АҚШда Демократик ва Республикачилар партияларидан номзодлар учун энг йирик бошланғич сайловлар бўлиб ўтди. Хейли 15 штатдан фақат биттасида — Вермонтда ғалаба қозонди.
The Wall Street Journal суҳбатдошларига кўра, Никки Хейли республикачиларнинг праймериздаги иштирокини тўхтатиш ҳақидаги қарорини маҳаллий вақт билан соат 10:00 да эълон қилади. Нашр манбаларининг қайд этишича, Хейли хоним пойга иштирокчиларидан бирортасини маъқуллаш ниятида эмас. Бироқ у ягона рақиби, собиқ АҚШ президенти Дональд Трампни уни қўллаб-қувватлаган сайловчиларнинг овозини олишга чақиради.
Ҳафта бошида Никки Хейли кетма-кет тўққизта мағлубиятдан сўнг, АҚШ пойтахти Вашингтонда бўлиб ўтган республикачиларнинг праймериз сайловларида биринчи ғалабасини қўлга киритди. Супер сешанба куни у атиги 43 делегатнинг қўллаб-қувватлашига эришди. Республикачилар партиясининг деярли барча бошланғич сайловларида ғалаба қозонган унинг рақиби Дональд Трамп 276 делегатнинг овозига эга бўлди. АҚШда президентлик сайловлари 2024 йил ноябрида бўлиб ўтади.
Изоҳ (0)