O‘zbekistonning uch hududida aksiz markasiz tamaki mahsulotlari savdosi bilan shug‘ullanib kelgan shaxslar ushlandi.
Ma’lum qilinishicha, Bosh prokuratura huzuridagi departamentning Uchtepa tuman bo‘limi, DXX va bojxona xodimlari hamkorligida o‘tkazilgan tezkor tadbirda xorijda ishlab chiqarilgan tamaki mahsulotlari savdosi bilan shug‘ullanib kelgan I.M. va boshqalar xonadonda umumiy bahosi 391,9 million so‘mlik 9 turdagi jami 20 890 quti aksiz markasiz tamaki mahsulotini sotish uchun saqlab qo‘ygani aniqlanib, ushbu mahsulotlar ashyoviy dalil sifatida olingan.
Shu kabi, departamentning Namangan tuman bo‘limi tomonidan o‘tkazilgan tezkor tadbirda tamaki mahsulotlari savdosi bilan shug‘ullanib kelgan Y.M. va T.S. (muqaddam sudlangan) jami 6 500 quti “Milano London” nomli aksiz markasiz tamaki mahsulotini fuqaro M.X.ga 4 420 AQSH dollariga sotishga kelishib, shundan 16 million so‘mni olgan vaqtida ashyoviy dalillar bilan ushlangan.
Departamentning Navoiy viloyati boshqarmasi tomonidan bojxona xodimlari bilan hamkorlikda o‘tkazilgan tezkor tadbirda esa tamaki mahsulotlari savdosi bilan shug‘ullanib kelgan O.B. o‘zining Nexia-2 avtomobilida hech qanday hujjatsiz uch turdagi jami 1 350 quti aksiz markasiz tamaki mahsulotini o‘tkazish maqsadida Navoiy shahriga olib kelayotgan vaqtida ashyoviy dalil sifatida olingan.
Mazkur holatlar yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)