Yangi Toshkent loyihasida 420 gektar maydonda “Markaziy bog‘” barpo etilib, 200 ming tup daraxt ekiladi

Yangi Toshkent loyihasida 420 gektar maydonda “Markaziy bog‘” barpo etilib, 200 ming tup daraxt ekiladi. Bu haqda bugun, 27-fevral kuni “Qurilish — Uzbuild-2024” xalqaro ko‘rgazmasi doirasida bo‘lib o‘tgan “O‘zbekistonda bunyodkorlik. Yangi Toshkent — tabiat va kelajak shahri” mavzusida konferensiyada taʼkidlangan. 

Qurilish va uy-joy kommunal xo‘jaligi vazirligi matbuot xizmatining maʼlum qilishicha, konferensiyada Yangi Toshkentni qurish konsepsiyasi, jarayonga joriy etilgan yangi, innovatsion yechimlar, aholi uchun yaratiladigan qulay infratuzilma va sharoitlar xususida taqdimot o‘tkazilgan. Xabarga ko‘ra, hududda 420 gektar maydonda “Markaziy bog‘” barpo etilib, 200 ming tup daraxt ekiladi.

Yangi Toshkent megaloyihasini amalga oshirishda eng zamonaviy ekologik transport tizimidan foydalaniladi. Yangi Toshkentda metro va elektrobuslar uyg‘unlikda harakatlanadi. Bunda “yashil va xavfsiz shahar” tamoyili asosida, piyodalar va velosipedlarning erkin harakatlanishi uchun qulay sharoit yaratiladi. Shu maqsadda 100 ming avtomobil uchun yer osti turargohlari quriladi. Avtomobil qatnovi uchun 14 ta zamonaviy tunellar hamda Chirchiq va Qorasuv daryolari ustida 7 ta ko‘prik bunyod etiladi. 

Markaziy Osiyoda ilk bor “uch-generatsiya” stansiyasining qurilishi orqali elektr ishlab chiqariladi, binolar kuz-qishda isitiladi, yozda esa sovitiladi. Barcha elektr, aloqa tarmoqlari, gaz va suv quvurlari yer tagidan o‘tkaziladi. Suv tejovchi texnologiyalarni qo‘llash hisobiga suv sarfi 2 baravar kamayadi. Oqova suvlar zamonaviy texnologiyalar asosida qayta ishlanib, sug‘orish va texnik maqsadlar uchun yo‘naltiriladi.

Cross Works kompaniyasi ijrochi direktori Hakan Agkaning aytishicha, kompaniya poytaxt kelajagi uchun bosh rejani yaratish ustida ish olib bormoqda. 

“Mazkur megaloyihani amalga oshirishda yetakchi maslahatchi va bosh rejachi sifatida tanlanganimizdan juda mamnunmiz. Muhim va masʼuliyatli jarayon bizdan muhandislik, obodonlashtirish, iqtisodiy prognozlar va boshqa ko‘plab yo‘nalishlarda eng ilg‘or kompaniyalar bilan hamkorlikni talab qildi. Bosh reja kelgusi asr davomida quriladigan yetti tumandan iborat bo‘lib, bunda taxminan 2,5 milliondan ziyod aholini qamrab olish rejalangan. Yangi shaharning bir qancha asosiy maqsadlari bor. Bunda eng birlamchisi — aholi sonining o‘sish suratini rejali va o‘ylangan tarzda amalga oshirilishi hamda Yangi Toshkentni kelajak avlod uchun xavfsiz hamda qulay makonga aylantirish”, — degan u.

Taʼkidlanishicha, 20 ming gektar maydonda 1 million aholi uchun qulay sharoit va eng maqbul infratuzilmada 100 ming aholiga mo‘ljallangan ko‘p qavatli uylar, 30 ta maktab, 20 ta bolalar bog‘chasi, ko‘p tarmoqli kasalxona va 5 ta oilaviy poliklinika quriladi.