Farg‘ona viloyati Rishton tumanida fuqaro O‘zbekiston Qizil kitobiga kiritilgan laylakni parvarishlab kelayotgani aniqlandi. Bu haqda Ekologiya, atrof-muhitni muhofaza qilish va iqlim o‘zgarishi vazirligi axborot xizmati xabar berdi.
Farg‘ona viloyati Ekologiya boshqarmasi Rishton tuman bo‘limiga tumanning “Guliston” mahallasida yashovchi fuqaro murojaat qilgan. U bir oy avval xonadoniga yaralangan laylak qushi kelib qolgani, uni o‘zi yashab turgan uyning hovlisiga olib kelib parvarishlagani va hozirda qushning holati yaxshilangani bois davlat inspektorlariga topshirishini bildirgan.
Farg‘ona viloyat prokuraturasi va Rishton tuman bo‘limi davlat inspektorlari aytilgan manzilga borganida haqiqatan ham bir dona O‘zbekiston Qizil kitobiga kiritilgan Turkiston oq laylagi parvarish qilinayotgani maʼlum bo‘lgan. Laylakka Farg‘ona shahridagi hayvonot bog‘ining maxsus veterinariya bo‘limida tibbiy yordam ko‘rsatilmoqda. U to‘liq tuzalgach, ochiq tabiatga qo‘yib yuboriladi.
Izoh (0)