Фарғона вилояти Риштон туманида фуқаро Ўзбекистон Қизил китобига киритилган лайлакни парваришлаб келаётгани аниқланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги ахборот хизмати хабар берди.
Фарғона вилояти Экология бошқармаси Риштон туман бўлимига туманнинг “Гулистон” маҳалласида яшовчи фуқаро мурожаат қилган. У бир ой аввал хонадонига яраланган лайлак қуши келиб қолгани, уни ўзи яшаб турган уйнинг ҳовлисига олиб келиб парваришлагани ва ҳозирда қушнинг ҳолати яхшилангани боис давлат инспекторларига топширишини билдирган.
Фарғона вилоят прокуратураси ва Риштон туман бўлими давлат инспекторлари айтилган манзилга борганида ҳақиқатан ҳам бир дона Ўзбекистон Қизил китобига киритилган Туркистон оқ лайлаги парвариш қилинаётгани маълум бўлган. Лайлакка Фарғона шаҳридаги ҳайвонот боғининг махсус ветеринария бўлимида тиббий ёрдам кўрсатилмоқда. У тўлиқ тузалгач, очиқ табиатга қўйиб юборилади.
Изоҳ (0)