Buxoroda gaz portlashi oqibatida bir kishi halok bo‘ldi

Buxorodagi avtomobil ehtiyot qismlari do‘koni yerto‘lasida gaz portlashi oqibatida bir kishi halok bo‘ldi. Bu haqda FVV matbuot xizmati xabar berdi.

Vazirlik xabariga ko‘ra, 1-mart kuni soat 08:57 larda Buxoro shahar, “Yoshlik” MFY, Alpomish ko‘chasida joylashagan ikki qavatli binoning 1-qavatidagi avtomobil ehtiyot qismlari do‘konining yerto‘lasida gaz-havo aralashmasi chaqnashi sodir bo‘lgani taxmin qilinmoqda.

Chaqnash oqibatida 1-qavatning ikki dona beton plitasi qulab tushgan. Chaqnash sababi va zarari aniqlanmoqda. Voqea joyida yong‘in sodir bo‘lmagan.

Dastlabki ma’lumotlarga ko‘ra, hodisa oqibatida bir nafar fuqaro olgan tan jarohatlari bilan voqea joyida halok bo‘lgan va yana bir nafar fuqaro turli darajadagi tan jarohatlari bilan shifoxonaga yuborilgan.

Voqea joyiga viloyat va shahar FVB rahbariyati hamda yong‘in-qutqaruv ekipajlari, IIB, Prokuratura, “Hududgazta’minot” va SSB xodimlari chiqqan.