Yo‘l-patrul xizmati xodimlarining tarbiyasiz harakatlari, sust ishlayotgan profilaktika inspektorlari — Senat 2023-yildagi huquqbuzarliklar haqida

Senatda bo‘lib o‘tgan Mudofaa va xavfsizlik masalalari qo‘mitasi majlisida aytilishicha, profilaktika inspektorlari faoliyatining sustligi oqibatida oldini olish imkoniyatlari mavjud bo‘lgan jinoyatlar hanuzgacha jami jinoyatlarning salmoqli qismini tashkil etmoqda.

Salbiy ko‘rsatkichlar yuqoriligicha qolayotgan hududlar:

• Toshkent shahri;
• Toshkent viloyati;
• Farg‘ona viloyati;
• Sirdaryo viloyati.

Senatorlarning fikricha, oilalardagi notinchlik, nizolarning o‘z vaqtida hal etilmasligi mahalla faollari va keng jamoatchilikning e’tiboridan chetda qolgani oqibatida o‘ta og‘ir jinoyatlar sodir etilmoqda.

2023-yil 12 oyida sodir etilgan 363 ta qotillikning 141 tasi yoki 38,8 foizi oila-turmush doirasidagi nizolar oqibatida kelib chiqqan.

Birgina misol, joriy yil 17-yanvar kuni Samarqand viloyatida yashovchi, 2014-yildan buyon ruhiy kasalliklar kasalxonasida ro‘yxatda turuvchi ruhiy kasal, 49 yoshli fuqaro uyida o‘zaro janjal oqibatida birga yashagan 2019-yildan buyon ruhiy kasalliklar kasalxonasida ro‘yxatda turuvchi 26 yoshli o‘g‘lini boshiga bolta bilan urib o‘ldirgan. Aynan shu kabi holatlar yaqin qarindoshlar o‘rtasida yuz berayotgan jinoyatlarni kamaytirish bo‘yicha kechiktirib bo‘lmas aniq choralarni belgilash lozimligini ko‘rsatmoqda, — deyiladi Senat axborotida.

Shu bilan birga, yoshlarning muammolarini bartaraf etishga lozim darajada e’tibor qaratilmagani oqibatida 2023-yilda yoshlar va voyaga yetmaganlar o‘rtasida sodir etilgan jinoyatlar o‘tgan 2022-yilga nisbatan 5,3 foizga ortgan.

Voyaga yetmaganlar tomonidan sodir etilgan jinoyatlarning soni ayrim hududlarda yuqoriligicha qolmoqda.

Bundan tashqari, 12 mingga yaqin ishsizlar tomonidan jinoyatlar sodir etilgani joylarda aholini ish bilan ta’minlash masalalari samarali hal etilmayotganini ko‘rsatdi.

Oliy Majlisi Senatiga aholidan kelayotgan ichki ishlar organlari faoliyati bilan bog‘liq murojaatlarning aksariyati xodimlarning, ayniqsa, yo‘l-patrul xizmati xodimlarining tarbiyasiz harakatlari, yo‘l harakati qatnashchilari bilan qo‘pol muomalasi ustidan e’tirozni aks ettirmoqda.

Shu bois Senat tomonidan yo‘l harakati xavfsizligini ta’minlash bo‘yicha aholining noroziligiga sabab bo‘layotgan omillar, xususan, avtomobil yo‘llarida o‘rnatilayotgan radarlar holati, ularni o‘rnatish me’yorlari, qonun va qonunosti hujjatlardagi tafovutlar batafsil o‘rganilishi rejalashtirilmoqda.