Сенатда бўлиб ўтган Мудофаа ва хавфсизлик масалалари қўмитаси мажлисида айтилишича, профилактика инспекторлари фаолиятининг сустлиги оқибатида олдини олиш имкониятлари мавжуд бўлган жиноятлар ҳанузгача жами жиноятларнинг салмоқли қисмини ташкил этмоқда.
-xfr0vveg.jpg)
Салбий кўрсаткичлар юқорилигича қолаётган ҳудудлар:
- Тошкент шаҳри;
- Тошкент вилояти;
- Фарғона вилояти;
- Сирдарё вилояти.
Сенаторларнинг фикрича, оилалардаги нотинчлик, низоларнинг ўз вақтида ҳал этилмаслиги маҳалла фаоллари ва кенг жамоатчиликнинг эътиборидан четда қолгани оқибатида ўта оғир жиноятлар содир этилмоқда.
2023 йил 12 ойида содир этилган 363 та қотилликнинг 141 таси ёки 38,8 фоизи оила-турмуш доирасидаги низолар оқибатида келиб чиққан.
Биргина мисол, жорий йил 17 январь куни Самарқанд вилоятида яшовчи, 2014 йилдан буён руҳий касалликлар касалхонасида рўйхатда турувчи руҳий касал, 49 ёшли фуқаро уйида ўзаро жанжал оқибатида бирга яшаган 2019 йилдан буён руҳий касалликлар касалхонасида рўйхатда турувчи 26 ёшли ўғлини бошига болта билан уриб ўлдирган. Айнан шу каби ҳолатлар яқин қариндошлар ўртасида юз бераётган жиноятларни камайтириш бўйича кечиктириб бўлмас аниқ чораларни белгилаш лозимлигини кўрсатмоқда, — дейилади Сенат ахборотида.
Шу билан бирга, ёшларнинг муаммоларини бартараф этишга лозим даражада эътибор қаратилмагани оқибатида 2023 йилда ёшлар ва вояга етмаганлар ўртасида содир этилган жиноятлар ўтган 2022 йилга нисбатан 5,3 фоизга ортган.
Вояга етмаганлар томонидан содир этилган жиноятларнинг сони айрим ҳудудларда юқорилигича қолмоқда.
Бундан ташқари, 12 мингга яқин ишсизлар томонидан жиноятлар содир этилгани жойларда аҳолини иш билан таъминлаш масалалари самарали ҳал этилмаётганини кўрсатди.
Олий Мажлиси Сенатига аҳолидан келаётган ички ишлар органлари фаолияти билан боғлиқ мурожаатларнинг аксарияти ходимларнинг, айниқса, йўл-патрул хизмати ходимларининг тарбиясиз ҳаракатлари, йўл ҳаракати қатнашчилари билан қўпол муомаласи устидан эътирозни акс эттирмоқда.
Шу боис Сенат томонидан йўл ҳаракати хавфсизлигини таъминлаш бўйича аҳолининг норозилигига сабаб бўлаётган омиллар, хусусан, автомобиль йўлларида ўрнатилаётган радарлар ҳолати, уларни ўрнатиш меъёрлари, қонун ва қонуности ҳужжатлардаги тафовутлар батафсил ўрганилиши режалаштирилмоқда.
Изоҳ (0)