Agar prezidentlik saylovlaridan keyin muxolifat hokimiyatga kelsa, Janubiy Afrika Respublikasi tashqi siyosat yo‘nalishini o‘zgartirishi va BRIKSni tark etishi mumkin. Bu haqda “TASS”ga bergan intervyusida JARning Rossiyadagi elchisi Mzuvukile Jeff Maketuka ma’lum qildi.
Agar rasmiy muxolifat saylovda g‘alaba qozonsa, JARning tashqi siyosatidagi pozitsiyasida o‘zgarishlar bo‘ladi. Argentinada bo‘lgani kabi JAR ham BRIKSdan chiqib ketish ehtimoli yuqori, — dedi u mamlakatdagi saylovlar natijasi Rossiya bilan siyosiy va iqtisodiy hamkorlik xarakterini qanday o‘zgartirishi mumkin, degan savolga javoban.
Diplomat ta’kidlaganidek, bunga JARdagi bir guruh muxolif partiyalarning Rossiyaga nisbatan dushmanligi sabab bo‘lmoqda. Mekatukaga ko‘ra, buni Rossiyada tahlil qilish lozim.
Saylov natijalariga ko‘ra, Afrika Milliy Kongressi saylovda g‘alaba qozonsa, hech qanday o‘zgarishlar bo‘lmaydi, men sizni ishontirib aytamanki, agar muxolif partiyalardan biri hokimiyatga kelsa, men hech narsa va’da bera olmayman. Asosiy muxolifat partiya — Demokratik alyans, bordiyu u saylovda g‘alaba qozonsa, menimcha, vaziyat o‘zgaradi. Bu haqiqat. Chunki asosiy muxolifat partiyasi Rossiyaning do‘sti emas, — deya xulosa qildi Maketuka.
Avvalroq JAR prezidenti Siril Ramafosa mamlakatda umumiy saylovlar 2024-yil 29-mayda o‘tkazilishi haqida aytgan edi. JAR umumiy saylovda g‘alaba qozongan partiya rahbari mamlakatning yangi prezidenti bo‘ladi. JARdagi hukmron Afrika milliy kongressi partiyasi allaqachon Ramafosani prezidentlikka nomzod sifatida tasdiqlagan.
Izoh (0)