Агар президентлик сайловларидан кейин мухолифат ҳокимиятга келса, Жанубий Африка Республикаси ташқи сиёсат йўналишини ўзгартириши ва БРИКСни тарк этиши мумкин. Бу ҳақда “ТАСС”га берган интервьюсида ЖАРнинг Россиядаги элчиси Мзувукиле Жефф Макетука маълум қилди.
Агар расмий мухолифат сайловда ғалаба қозонса, ЖАРнинг ташқи сиёсатидаги позициясида ўзгаришлар бўлади. Аргентинада бўлгани каби ЖАР ҳам БРИКСдан чиқиб кетиш эҳтимоли юқори, — деди у мамлакатдаги сайловлар натижаси Россия билан сиёсий ва иқтисодий ҳамкорлик характерини қандай ўзгартириши мумкин, деган саволга жавобан.
Дипломат таъкидлаганидек, бунга ЖАРдаги бир гуруҳ мухолиф партияларнинг Россияга нисбатан душманлиги сабаб бўлмоқда. Мекатукага кўра, буни Россияда таҳлил қилиш лозим.
Сайлов натижаларига кўра, Африка Миллий Конгресси сайловда ғалаба қозонса, ҳеч қандай ўзгаришлар бўлмайди, мен сизни ишонтириб айтаманки, агар мухолиф партиялардан бири ҳокимиятга келса, мен ҳеч нарса ваъда бера олмайман. Асосий мухолифат партия — Демократик альянс, бордию у сайловда ғалаба қозонса, менимча, вазият ўзгаради. Бу ҳақиқат. Чунки асосий мухолифат партияси Россиянинг дўсти эмас, — дея хулоса қилди Макетука.
Аввалроқ ЖАР президенти Сирил Рамафоса мамлакатда умумий сайловлар 2024 йил 29 майда ўтказилиши ҳақида айтган эди. ЖАР умумий сайловда ғалаба қозонган партия раҳбари мамлакатнинг янги президенти бўлади. ЖАРдаги ҳукмрон Африка миллий конгресси партияси аллақачон Рамафосани президентликка номзод сифатида тасдиқлаган.
Изоҳ (0)