O‘n yildan ortiq vaqt Maykl Jeksonning qo‘riqchisi sifatida ishlagan Mett Fiddes The Stephen Sully Study’ga intervyu berdi. Podkastda pop-yulduz birinchi plastik jarrohlik amaliyotini boshdan kechirishiga nima sabab bo‘lganligi haqida aytib berdi.
Uning so‘zlariga ko‘ra, Mayklni bolaligidan burni kattaligi uchun atrofdagilar mazah qilishgan. Ayniqsa, uning otasi o‘g‘lini doim yerga urib kelgan: “Bunday katta va xunuk burning onangdan o‘tgani aniq, bizning avlodda bunday nuqson bo‘lmagan”, — derdi u.
Mett Fiddesning so‘zlariga ko‘ra, otasining gaplari Mayklning dilini og‘ritar edi, biroq burunni operatsiya qilishga boshqa voqea turtki bo‘lgan:
“Maykl kuniga o‘rtacha uch soat raqsga tushar, doim harakatda bo‘lar edi. Bir kuni raqs mashg‘ulotlarining birida u ketma-ket ellik marta aylanishni amalga oshirdi va yiqilib tushdi. Burnini sindirib olgani aniqlangach, shifokorlar uni operatsiya qilishni tavsiya qildi. Narkoz ta’siri ostida rinoplastikani ham amalga oshirish imkoniyatidan foydalanib, Maykl Jekson ilk bor jarrohlik stoliga yotgan edi”, — deya so‘zida davom etdi Mett.
Sobiq qo‘riqchi Mayklning necha marta operatsiya qilinganini bilmasligini, bu mavzuga hech qachon aralashmaganini ta’kidladi:
“Shu voqeadan so‘ng Jekson tashqi ko‘rinishi ustida ko‘plab o‘zgartirishlar kirita boshladi, chunki u pop-qirol sifatida imijini saqlab qolishi kerak edi. Bundan tashqari, ovoz yozish studiyalari unga milliardlab pul to‘lashardi”, — deydi Mett.
Izoh (0)