Ўн йилдан ортиқ вақт Майкл Жексоннинг қўриқчиси сифатида ишлаган Мэтт Фиддес The Stephen Sully Study’га интервью берди. Подкастда поп-юлдуз биринчи пластик жарроҳлик амалиётини бошдан кечиришига нима сабаб бўлганлиги ҳақида айтиб берди.
Унинг сўзларига кўра, Майклни болалигидан бурни катталиги учун атрофдагилар мазаҳ қилишган. Айниқса, унинг отаси ўғлини доим ерга уриб келган: “Бундай катта ва хунук бурнинг онангдан ўтгани аниқ, бизнинг авлодда бундай нуқсон бўлмаган”, — дерди у.
Мэтт Фиддеснинг сўзларига кўра, отасининг гаплари Майклнинг дилини оғритар эди, бироқ бурунни операция қилишга бошқа воқеа туртки бўлган:
“Майкл кунига ўртача уч соат рақсга тушар, доим ҳаракатда бўлар эди. Бир куни рақс машғулотларининг бирида у кетма-кет эллик марта айланишни амалга оширди ва йиқилиб тушди. Бурнини синдириб олгани аниқлангач, шифокорлар уни операция қилишни тавсия қилди. Наркоз таъсири остида ринопластикани ҳам амалга ошириш имкониятидан фойдаланиб, Майкл Жексон илк бор жарроҳлик столига ётган эди”, — дея сўзида давом этди Мэтт.
Собиқ қўриқчи Майклнинг неча марта операция қилинганини билмаслигини, бу мавзуга ҳеч қачон аралашмаганини таъкидлади:
“Шу воқеадан сўнг Жексон ташқи кўриниши устида кўплаб ўзгартиришлар кирита бошлади, чунки у поп-қирол сифатида имижини сақлаб қолиши керак эди. Бундан ташқари, овоз ёзиш студиялари унга миллиардлаб пул тўлашарди”, — дейди Мэтт.
Изоҳ (0)