Lego конструкторлари дунёдаги энг машҳур ўйинчоқлардан биридир. Унинг пластик ғиштлари билан болалар бир неча соат ўйнаши ҳамда ранг ва шакли ёрдамида турфа ғояларни осонгина амалга ошириши мумкин.
Болаликдан Lego’га бўлган муҳаббат чехиялик Милош Кржечекда ўйинчоқнинг барча турларини тўплаш фикрини уйғотди. Ҳозирда бу хоббига бутун умрини бағишлаган коллексионернинг бир нечта Lego музейлари бор.
Милош ўзининг илк тўпламини 5 ёшида Янги йил байрами арафасида ҳадяга олган. Ўша кундан бошлаб у турли Lego конструкторларини коллекция қилиб келмоқда. Бугун у 6000 дан ортиқ турдаги конструкторлар эгаси бўлиб, улар ичида қиймати бир неча минг долларга етадиган тўпламлар ҳам мавжуд. Узоқ муддатли хоббиси сабабли чехиялик коллексионер Гиннес рекордлари китобига киритилган.
“Тўпламимдаги деярли 90 фоиз конструкторларни ўзим харид қилганман, лекин менга совға тариқасида ҳам Lego бериб туришади ва бу албатта мени хурсанд қилади”, — дейди Милош.
Катта сиғимдаги Lego ўйинчоқларини уйда сақлашнинг имкони йўқ, шу сабабли Милош 4 та шаҳарда ўзининг махсус музейларини очган.
Изоҳ (0)