Armanistonga oid jamoaviy xavfsizlik shartnomasi bajarilmadi, shuning uchun Yerevan KXSHTdagi ishtirokini muzlatib qo‘ydi. Bu haqda respublika bosh vaziri Nikol Pashinyan France24 telekanaliga bergan intervyusida ma’lum qildi.
“Bizning fikrimizcha, Armanistonga oid Kollektiv xavfsizlik shartnomasi, ayniqsa, 2021—2022-yillarda amalga oshirilmadi va bu bizning e’tiborimizdan chetda qolmadi. Ushbu tashkilotdagi ishtirokimizni muzlatib qo‘ydik. Ko‘ramiz, oldinda nimalar bo‘ladi”, — dedi Pashinyan.
Armaniston bosh vaziri Rossiya rasmiylarining pozitsiyasini ham tanqid qildi. Jumladan, Rossiya bir necha oy oldin “Armaniston aholisini hukumatni ag‘darishga ochiq chaqirganini, Moskvadan unga qarshi mazkur propaganda zaiflashmasligini” ta’kidladi.
“Biz hududimizdagi noqonuniy harakatlarga toqat qila olmaymiz”, — dedi Armaniston bosh vaziri va “Yerevan talablari javobsiz qolsa, oqibatlari” bilan tahdid qildi.
Shuningdek, u hozirda Armaniston va Ozarbayjon o‘rtasida tinchlik o‘rnatishni tasavvur qilib bo‘lmasligini aytdi.
2022-yilda Yerevan va Boku Rossiya, AQSH va Yevropa Ittifoqi vositachiligida kelajakdagi tinchlik shartnomasini muhokama qila boshlagandi. Yaqin o‘tmishda tomonlar tinchlik shartnomasining yakuniy loyihasi ustida ish olib borgan.
“Agar Ozarbayjon Armanistonni “G‘arbiy Ozarbayjon” deb hisoblasa, shuningdek, yaqinda yuz bergan hujumni hisobga olsak, buning iloji yo‘q, hozirda bu tinchlikni tasavvur qilib bo‘lmaydi”, — dedi Pashinyan.
Uning so‘zlariga ko‘ra, Ozarbayjon bayonotlari inobatga olinsa, Armanistonga qarshi yangi hujum ehtimoli katta, degan xulosaga kelish mumkin.
“Ozarbayjonning yaqindagi hujumiga kelsak, biz tergov o‘tkazishni talab qildik, ammo shunga qaramay, Ozarbayjon vaziyatdan o‘z ritorikasini kuchaytirish uchun foydalanmoqda. Bularning barchasi bizni Ozarbayjon Armanistonga qarshi yangi hujumga tayyorgarlik ko‘rayotgani haqida o‘ylashga majbur qiladi”, — deya qo‘shimcha qildi u.
Yerevan bir necha bor KXSHT va Moskvani o‘z majburiyatlarini bajarmaganlikda ayblagan. Yanvar oyida Armaniston xavfsizlik kengashi kotibi Armen Grigoryan respublikaning tashkilotdan “hech qanday umidi yo‘qligi”, chunki 2022-yil sentyabr oyida “keng miqyosli hujum” vaqtida “adekvat reaksiya” olmaganini aytgandi.
- 2023-yilning 23 noyabrida Pashinyan Minskdagi KXSHT sammitida ishtirok etishdan bosh tortgan edi.
- KXSHTga oltita davlat: Armaniston, Belarus, Qozog‘iston, Qirg‘iziston, Rossiya va Tojikiston kiradi.
Izoh (0)