Toshkent shahri va Buxoro viloyatida hamkorlikda o‘tkazilgan tadbirlar davomida yer resurslarini talon-toroj qilish bilan bog‘liq holatlarga chek qo‘yildi, deb xabar beradi IIV Tezkor-qidiruv departamenti axborot xizmati.
Qayd etilishicha, 26-yanvar kuni IIV Tezkor-qidiruv departamenti jinoyat qidiruv xizmati Korrupsiya va iqtisodiy jinoyatlarga qarshi kurashish boshqarmasi xodimlari tomonidan Bosh prokuratura huzuridagi Iqtisodiy jinoyatlarga qarshi kurashish departamenti bilan hamkorlikda Toshkent shahri Yashnobod tumanida tezkor tadbir o‘tkazilgan.
Tadbir davomida aniqlanishicha, “Sunnat spets stroy” MCHJning 47 yoshli taʼsischisi boshqa bir fuqaroga Toshkent viloyati O‘rta Chirchiq tumanidagi “Sunnat spets stroy” MCHJga ajratilgan 6,7 gektar yer maydonini jami 1 million 340 ming dollarga va u yerga tutash bo‘lgan tuman hokimligi zaxirasidagi 2 gektar yer maydonini 10 ming dollar evaziga 10 yil muddatga foydalanish uchun Kadastr bo‘limida ishlovchi tanishlari orqali hujjatlarini rasmiylashtirib berishni vaʼda qilgan.
Hamkorlikdagi tezkor tadbir davomida gumonlanuvchi Yashnobod tumani Botkina ko‘chasidagi kafeda avans tariqasida 50 ming dollar miqdordagi pulni olgan vaqtida ashyoviy dalil bilan ushlangan.
Shuningdek, 8-fevral kuni Buxoro viloyat IIB tezkor xodimlari tomonidan Buxoro tumanida ham tezkor tadbir o‘tkazilgan. Tadbirda 29 hamda 26 yoshli ayol va erkak 1998-yilda Buxoro shahrida tug‘ilgan shaxsga Navoiy viloyati Nurota tumani Yangihayot massivida joylashgan tuman hokimligi tomonidan 10 yillik ijara shartnomasi asosida foydalanishga berilgan yer maydonidan 25 gektarini Davlat kadastrlar palatasi G‘ijduvon tumani filiali yer hisobotini yuritish bo‘limi boshlig‘i orqali nomiga rasmiylashtirib berishni vaʼda qilgan.
Tezkor tadbir davomida yuqorida qayd etilgan shaxslar 20 ming AQSH dollarini olgan vaqtida ashyoviy dalil bilan ushlangan.
Har ikki holat yuzasidan jinoyat ishi qo‘zg‘atilib tergov harakatlari olib borilmoqda.
- Avvalroq Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi.
- Aprel boshlarida esa Navoiyda 80 gektar yerni 1 milliard so‘mga sotishga uringan shaxslar ushlangani,
- Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi.
Izoh (0)