Тошкент шаҳри ва Бухоро вилоятида ҳамкорликда ўтказилган тадбирлар давомида ер ресурсларини талон-торож қилиш билан боғлиқ ҳолатларга чек қўйилди, деб хабар беради ИИВ Тезкор-қидирув департаменти ахборот хизмати.
Қайд этилишича, 26 январь куни ИИВ Тезкор-қидирув департаменти жиноят қидирув хизмати Коррупция ва иқтисодий жиноятларга қарши курашиш бошқармаси ходимлари томонидан Бош прокуратура ҳузуридаги Иқтисодий жиноятларга қарши курашиш департаменти билан ҳамкорликда Тошкент шаҳри Яшнобод туманида тезкор тадбир ўтказилган.
Тадбир давомида аниқланишича, “Sunnat spets stroy” МЧЖнинг 47 ёшли таъсисчиси бошқа бир фуқарога Тошкент вилояти Ўрта Чирчиқ туманидаги “Sunnat spets stroy” МЧЖга ажратилган 6,7 гектар ер майдонини жами 1 миллион 340 минг долларга ва у ерга туташ бўлган туман ҳокимлиги захирасидаги 2 гектар ер майдонини 10 минг доллар эвазига 10 йил муддатга фойдаланиш учун Кадастр бўлимида ишловчи танишлари орқали ҳужжатларини расмийлаштириб беришни ваъда қилган.
Ҳамкорликдаги тезкор тадбир давомида гумонланувчи Яшнобод тумани Боткина кўчасидаги кафеда аванс тариқасида 50 минг доллар миқдордаги пулни олган вақтида ашёвий далил билан ушланган.
Шунингдек, 8 февраль куни Бухоро вилоят ИИБ тезкор ходимлари томонидан Бухоро туманида ҳам тезкор тадбир ўтказилган. Тадбирда 29 ҳамда 26 ёшли аёл ва эркак 1998 йилда Бухоро шаҳрида туғилган шахсга Навоий вилояти Нурота тумани Янгиҳаёт массивида жойлашган туман ҳокимлиги томонидан 10 йиллик ижара шартномаси асосида фойдаланишга берилган ер майдонидан 25 гектарини Давлат кадастрлар палатаси Ғиждувон тумани филиали ер ҳисоботини юритиш бўлими бошлиғи орқали номига расмийлаштириб беришни ваъда қилган.
Тезкор тадбир давомида юқорида қайд этилган шахслар 20 минг АҚШ долларини олган вақтида ашёвий далил билан ушланган.
Ҳар икки ҳолат юзасидан жиноят иши қўзғатилиб тергов ҳаракатлари олиб борилмоқда.
- Аввалроқ Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди.
- Апрель бошларида эса Навоийда 80 гектар ерни 1 миллиард сўмга сотишга уринган шахслар ушлангани,
- Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди.
Изоҳ (0)