Qashqadaryo viloyatida joylashgan “Hisor” davlat qo‘riqxonasiga o‘rnatilgan foto-videoqopqonlar orqali qor qoplonlarining katta to‘dasi tasvirga olindi. Bu haqda Ekologiya, atrof-muhitni muhofaza qilish va iqlim o‘zgarishi vazirligi matbuot xizmati xabar berdi.
Qo‘riqxona xodimlarining so‘zlariga ko‘ra, qor qoplonlari soni ko‘paygan. Ilgari ular ikkitadan ortmagan bo‘lsa, hozir qor qoplonlarining soni 3-4 taga yetadi.
Qor qoploni Xalqaro tabiatni muhofaza qilish ittifoqi va O‘zbekiston Qizil kitobiga kiritilgan noyob tur hisoblanadi. Shuningdek, SITES — yo‘q bo‘lib ketish xavfi ostidagi yovvoyi fauna va flora turlari bilan xalqaro savdo qilish to‘g‘risidagi Konvensiya ro‘yxatiga kiritilgan. Ovlash qat’iyan taqiqlangan.
O‘zbekistondan tashqari Xitoy, Nepal, Qirg‘iziston, Mongoliya, Tojikiston, Pokiston, Rossiya, Qozog‘iston, Hindiston, Afg‘oniston va Butan kabi davlatlar hududida uchraydi. Muhofaza etiladigan tabiiy hududda Qizil kitobga kiritilgan hayvonlarni ovlaganlik uchun jazoning kuchaytirilgani, hayvonot dunyosini muhofaza qilish — hayvonot dunyosi obyektlari hududlari, turlari va populyatsiyasi yaxlitligini, soni, ularning yo‘q bo‘lib ketishi va boshqa zararli ta’sirlarning oldini olishga qaratilgan.
Eslatib o‘tamiz, 2023-yil dekabrda “Hisor” qo‘riqxonasining 40 yillik tarixida birinchi marotaba qo‘riqlash xodimlari tomonidan o‘rnatilgan foto-videoqopqonlar orqali qor qoplonlarining katta to‘dasi tasvirga olingan edi.
Izoh (0)