Namanganda ilk qo‘g‘irchoq teatri faoliyatini boshladi

Namanganda ilk bor viloyat qo‘g‘irchoq teatri faoliyatini boshladi. Bu haqda “Daryo” muxbiri Azizbek Abduvaliyev xabar bermoqda.

Namangan shahridagi sobiq “O‘zbekiston” kinoteatri binosini qayta taʼmirlash va jihozlash ishlariga 19 milliard so‘mga yaqin mablag‘ sarflandi.

Bayramona bezatilgan 240 o‘rinli tomosha zali va 70 o‘rinli kinozal bolalar ixtiyoriga topshirildi.

Teatrning kirish qismida yosh tomoshabinlarni turli asarlar qahramonlari bo‘lgan qo‘g‘irchoqlar qarshi oladi. Shu yerning o‘zida qo‘g‘irchoqlarni tayyorlash sexi ham o‘rin olgan.

Ochilish marosimida mehmonlarga yangi teatrdagi ilk sahna asari — Iqbol Mirzo qalamiga mansub “Alisher Navoiy va Husaynning yoshligi” spektakli namoyish etildi.

Tadbirda viloyat hokimi Shavkat Abdurazzoqov, madaniyat vazirining birinchi o‘rinbosari Avazxon Tojixonov ishtirok etdi.