AQSHning O‘zbekistondagi elchisi Jonatan Xenik va USAID missiyasi direktori Mikaela Meredit 25-aprel kuni Xalqaro qishloq xo‘jaligi universiteti kampusiga tashrif buyurib, ekologik g‘oyalar bo‘yicha talabalar tanlovi g‘oliblarini taqdirladi.
“Global darajada o‘yla, mahalliy darajada harakat qil” mavzusidagi ekologik g‘oyalar bo‘yicha talabalar tanlovi 2023-yil mart oyida USAID’ning Agrobiznesni rivojlantirish loyihasi tomonidan XQXU bilan hamkorlikda e’lon qilingan. Tanlov iqlim va ekologik savodxonlik, plastikdan voz kechish, ekologik toza moda, global tozalash kabi mavzular, daraxt ekish jarayonini qamrab oldi.
Aslini olganda, 3 a’zodan iborat bo‘lgan 12 ta jamoa XQXU o‘qituvchilarining ko‘magi ostida turli loyihalarni ishlab chiqdi. Finalga chiqqan uch jamoa turli sovrin va sovg‘alar, barcha ishtirokchilar esdalik tashakkurnomalar bilan taqdirlandi.
“Iqlim o‘zgarishiga moslashish nuqtayi nazaridan, qishloq xo‘jaligi resurs eng ko‘p sarf qilinadigan tarmoq hisoblanadi. Kelajak avlodlarning oziq-ovqat mahsulotlaridan foydalanish imkoniyatlari barqaror bo‘lishini ta’minlash uchun puxta bilimga ega bo‘lib, innovatsion fikrlaydigan yosh mutaxassislarga atrof-muhitni himoya qilishning ilg‘or uslublarini tatbiq etish imkoniyatini taqdim etish nihoyatda muhim. Bugun qishloq xo‘jaligi sohasida turli ta’lim dasturlarini taklif qilayotgan yangi innovatsion ta’lim muassasasi bo‘lmish Xalqaro qishloq xo‘jaligi universitetiga tashrif buyurishdan bag‘oyat mamnunman”, — degan AQSH elchisi Jonatan Xenik.
“Iqlim o‘zgarishiga moslashish USAID global faoliyatining asosini tashkil etadi. Butun dunyo bo‘ylab biz hukumatlar bilan hamkorlik qilib, ularga mahalliy hamjamiyatlar bilan birgalikda o‘z milliy iqlim strategiyalarini amalga oshirish va chidamliligini kuchaytirishga yordam beramiz. Ilm-fan vakillari bilan bo‘lgan hamkorligimiz esa bilimlarni mustahkamlash va innovatsiyalarni qo‘llab-quvvatlashga qaratilgan”, — deb qo‘shimcha qilgan USAID missiyasi direktori Mikaela Meredit.
U talabalarning bilimi naqadar puxta, novatorlik g‘oyalari esa ilg‘or ekanini ta’kidlab, ular taqdim etgan ko‘plab g‘oyalarni nafaqat O‘zbekistonda, balki butun dunyoda ham tatbiq etish mumkinligini qayd etgan.
Yer kuni-2023 ga bag‘ishlangan tadbir yakunida USAID qishloq xo‘jaligi vaziri Aziz Voitov hamda XQXU rektori Munira Aminova bilan daraxt ekish marosimida ishtirok etdi.
Izoh (0)