Qizamiqqa qarshi vaksinalarning nojo‘ya ta’siri yuzasidan mas’ullarga deputatlik so‘rovi yuborildi

Kuz-qish mavsumlarida qizamiq kasalligi bilan kasallanish holatlari ko‘paygani va ushbu vaziyatda ayrim fuqarolar yuqumli kasalliklarga qarshi emlash amaliyotini davlat tibbiy muassasalaridan ko‘ra xususiy klinikalarda o‘tkazishni afzal ko‘rishayotgani, bu esa ortiqcha xarajat va noqulayliklarni yuzaga keltirishi, qolaversa, ba’zida emlashdan keyingi nojo‘ya ta’sirlarning mavjudligi masalalari ko‘plab fuqarolar, jumladan, ijtimoiy tarmoq foydalanuvchilarining haqli e’tirozlariga sabab bo‘lmoqda.

Bu borada O‘zbekiston “Adolat” SDP faollari va deputatlarining joylarda olib borilgan o‘rganishlari va fuqarolardan kelib tushayotgan murojaatlar asosida partiyaning Oliy Majlis Qonunchilik palatasidagi fraksiyasi a’zolari tomonidan mas’ullarga mavjud holat bo‘yicha asoslantirilgan tushuntirish va izoh berilishi yuzasidan deputatlik so‘rovi yuborildi. Bu haqda “Adolat” partiyasi “Daryo”ga ma’lum qildi.

“Nima sababdan nodavlat klinikalarda foydalaniladigan vaksinalar davlat tibbiyot muassasalarida qo‘llanadigan vaksinalardan ko‘ra nojo‘ya ta’siri kamroq deya ko‘rilmoqda? Agar masala vaksinada bo‘lsa, nima sababdan eng xavfsiz va nojo‘ya ta’siri minimal bo‘lgan vaksinalar davlat tibbiyot muassasalariga sotib olinmayapti? Vaksinalar xarid qilishda ularning nojo‘ya ta’siri bo‘yicha aholining fikri o‘rganiladimi?” — deyiladi deputatlik so‘rovida.