AQSH o‘zining Xalqaro taraqqiyot agentligi (USAID) orqali qiymati 410 ming dollarga teng bo‘lgan 131 tonna oziq-ovqat yordamini O‘zbekistonga yetkazib berdi, deb xabar bermoqda AQSHning O‘zbekistondagi elchixonasi matbuot xizmati.
Qayd etilishicha, 23-noyabr kuni keltirilgan yuk to‘yimli sabzavotlar va dukkaklilar aralashmasidan iborat bo‘lib, 98 ta sog‘liqni saqlash va ijtimoiy himoya muassasasiga tarqatilib, mamlakatdagi 35 ming nafar eng yordamga muhtoj fuqarolarga tarqatiladi.
Ular qatoriga dori-darmonga chidamli sil kasalligi bilan og‘rigan bemorlar, uzoq muddatli parvarishlash muassasalari, mehribonlik uylari va keksalar va nogiron bolalarni parvarishlash va qo‘llab-quvvatlash muassasalaridagi fuqarolar kiradi.
2010-yildan buyon USAID'ning oziq-ovqat ko‘magini berish xalqaro hamkorlik dasturi doirasida qiymati 4 million dollardan ortiq 1425 tonna oziq-ovqat yordami O‘zbekistonga yetkazib berilgan. Beg‘araz yordam sifatida berilgan bu oziq-ovqat mahsulotlari Amerikaning notijorat tashkiloti Resource Policy Exchange tomonidan “Sog‘lom avlod uchun” xalqaro xayriya jamg‘armasi bilan hamkorlikda tarqatiladi.
O‘zbekistonga yaqinda keltirilgan bu gumanitar yordam AQSHning sog‘liqni saqlash sohasiga kiritgan 122 million AQSH dollardan ziyod uzoq muddatli sarmoyasining davomi bo‘lib, so‘nggi 20 yil mobaynida berilgan umumiy yordam qiymati 1 milliard AQSH dollaridan oshgan.
Izoh (0)