Litsenziyasi bekor qilingan OTMning biror-bir talabasi ko‘chada qolmaydi — Oliy ta’lim vazirligi

O‘zbekistonda litsenziyasi bekor qilingan oliy taʼlim tashkilotlarining biror-bir talabasi ko‘chada qolmaydi. Bu haqda Oliy ta’lim, fan va innovatsiyalar vazirligi matbuot xizmati xabar berdi.

Qayd etilishicha, nodavlat oliy taʼlim tashkilotlarida taʼlim jarayonini tashkil etish va litsenziya talablari buzilganlik holatlari bo‘yicha vazirlikka kelib tushgan norozilik murojaatlari asosida tekshirish natijalariga ko‘ra, hozirga qadar lisenziya talablari va shartlarini qo‘pol ravishda buzgani uchun 6 ta nodavlat oliy taʼlim tashkilotining tegishli litsenziyasini bekor qilish bo‘yicha sudga da’vo arizalari kiritilgan. Shundan 5 tasining tegishli litsenziyalari sud qaroriga ko‘ra bekor qilingan bo‘lsa, 1 ta nodavlat oliy taʼlim tashkilotining litsenziyasini bekor qilish bo‘yicha sud jarayoni davom etmoqda.

Prezident qaroriga ko‘ra, litsenziyasi bekor qilingan taʼlim tashkiloti yoki yopilgan taʼlim dasturida tahsil olayotgan talabalarga o‘qishini davlat va nodavlat taʼlim tashkilotlarining mos va turdosh taʼlim yo‘nalishlari va mutaxassisliklariga belgilangan tartibda ko‘chirish huquqi vazirlikka berilgan.

Shundan kelib chiqib, bugungi kunga qadar sud jarayonlari to‘liq yakunlangan va litsenziyasi bekor qilingan oliy taʼlim tashkilotlari — Valley Innovative University, Urganch shahridagi Binari universitetining barcha talabalari tegishli tartibda oliy taʼlim tashkilotlariga ko‘chirilgan. Hozirda litsenziyasi bekor qilingan boshqa oliy taʼlim tashkilotlari talabalarinining o‘qishini ko‘chirish ishlari tashkil etilmoqda.

“Vazirlik litsenziyasi bekor qilingan oliy taʼlim tashkilotlarining biror-bir talabasi ko‘chada qolmasligini maʼlum qiladi. Barcha talabalarning arizasiga asosan o‘qishi belgilangan tartibda boshqa oliygohlarga ko‘chirilishi taʼminlanadi”, — deyiladi xabarda.

Eslatib o‘tamiz, 2023-yil iyul o‘rtalarida Oliy ta’lim, fan va innovatsiyalar vazirligi At-Termiziy nomidagi xalqaro universitetga oliy ta’lim xizmatlarini ko‘rsatish uchun litsenziya berilmaganini ma’lum qilgandi. “Ta’lim to‘g‘risida”gi qonunning 29-moddasiga asosan, nodavlat ta’lim tashkilotlari litsenziya olingan kundan e’tiboran ta’lim faoliyati bilan shug‘ullanishga haqlidir.