АҚШ Халқаро тараққиёт агентлиги (USAID) ҳамкорлари хотин-қизларнинг IT соҳасидаги ютуқлари ҳамда Tumaris.Tech ва FoundHer лойиҳалари натижаларини намойиш этиш учун Тошкентдаги IT Park’да тўпланди. Бу ҳақда АҚШнинг Ўзбекистондаги элчихонаси матбуот хизмати хабар берди.
2020 йилнинг июнида IT Park томонидан ва USAID’нинг тадбиркорлик ва бизнес муҳитини ривожлантириш бўйича лойиҳаси кўмагида ишга туширилган Tumaris.Tech лойиҳаси ахборот технологиялари секторида тадбиркор хотин-қизларнинг имкониятларини кенгайтириш бўйича инновацион дастур ҳисобланади. Ўтган икки йил давомида Tumaris.Tech лойиҳаси нафақат Ўзбекистон ҳудудида, балки Марказий Осиё давлатларидан ҳам иштирокчиларни жалб этиб, 200 дан ортиқ хотин–қизни ўқитиш, 46 та стартап лойиҳасини қўллаб-қувватлаш ва 50 та технологик маҳсулотни ишга тушириш орқали ўз фаолияти географиясини кенгайтирди.
Хотин-қизларнинг тадбиркорлигини ривожлантиришга йўналтирилган FoundHer лойиҳаси Ўзбекистонда истиқболли бизнес ғояларни излаш билан шуғулланиб, олти ой давомида бизнесни ривожлантиришга ҳисса қўшган. FoundHer лойиҳаси Марказий Осиёда ахборот технологиялари соҳасида хотин-қизлар учун тенг шарт-шароитларни яратишга содиқлигини намойиш этиб, тренинглар ва мураббийликни ташкиллаштиришга кўмаклашган, бунинг натижасида лойиҳа иштирокчиларининг Кремний водийсига сафари ҳамда АҚШда 2023 йилдаги Қишки саммитда иштироки таъминланган.
USAID’нинг гендер тенглик ҳамда хотин-қизларнинг ҳуқуқ ва имкониятларини кенгайтириш бўйича бош мувофиқлаштирувчиси Жамила Бижио тадбирда иштирок этиб, лойиҳаларнинг ютуқлари ва натижаларидан мамнун эканини билдирган.
Бундан олдин USAID’нинг Ўзбекистондаги миссиясига янги раҳбар тайинлангани, USAID Тошкентда экологик ғоялар бўйича талабалар танлови ғолибларини тақдирлагани, АҚШ халқаро тараққиёт агентлиги Ўзбекистонга 131 тонна озиқ-овқат ёрдами етказиб бергани маълум қилинганди.
Изоҳ (0)