Bojxona qo‘mitasi Toshkentning Sergeli tumanida yong‘in sodir bo‘lgan ombor bojxona organlari bino va inshootlari sirasiga kirmasligini ma’lum qildi.
Qo‘mita matbuot xizmati bosh inspektori Husan Tangriyevning yozishicha, Inter Logistics MCHJga qarashli omborda sodir bo‘lgan yong‘in ijtimoiy tarmoqlarda keng muhokamalarga sabab bo‘lmoqda. Muhokamalarda yong‘in obyekti bojxona inshooti sifatida talqin qilinmoqda. Shu boisdan ko‘plab fuqarolar xavotir olib, murojaat qilmoqda.
Uning qayd etishicha, mazkur omborning ma’lum bir qismi bojxona ombori maqomiga ega.
Bojxona ombori — tadbirkorlik subyektlarining litsenziyalanadigan faoliyat turiga kiradi. Bunda ombor egasi — tadbirkorlik subyekti boshqa tadbirkorlarning O‘zbekistonga olib kelingan tovarlarini, sodda qilib aytganda, hali “rastamojka” qilinmagan tovarlarni o‘zaro kelishuv asosida bojxona rasmiylashtiruvi yakunlanguniga qadar saqlab turadi.
Dunyo amaliyotida, jahon tajribasida bu kabi omborlar bojxona ombori deb yuritiladi. Hozirda O‘zbekistonda tegishli litsenziyaga ega 400 ga yaqin bojxona omborlari faoliyat yuritmoqda.
“Yuqoridagilardan kelib chiqib, bojxona omborlari, xususan yong‘in sodir bo‘lgan ombor ham bojxona organlarining bino va inshootlari sirasiga kirmasligini eslatib o‘tamiz”, — deya tushuntirish bergan Husan Tangriyev.
Sog‘liqni saqlash vazirligiga ko‘ra, ushbu hodisa oqibatida jabrlanganlarning umumiy soni 163 kishini tashkil etdi, bir nafar o‘smir hodisa oqibatida vafot etdi.
IIV bergan axborotda aytilishicha, Inter Logistics MCHJga qarashli 18,4 gektar yer maydonda joylashgan omborxonada taxminan 10 000 kvadrat metr maydonda yong‘in kelib chiqqan. Holat yuzasidan IIV Tergov departamenti tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atildi.
Sodir bo‘lgan favqulodda hodisani o‘rganish, ko‘rilgan talafotlarni bartaraf etish va jabrlanganlarga yordam ko‘rsatish bo‘yicha prezident topshirig‘iga ko‘ra hukumat komissiyasi tuzildi.
Izoh (0)