Qoraqalpog‘istonda 6 nafar fuqaro 31 ta ratsiyadan tegishli ruxsatnoma rasmiylashtirmay foydalangani aniqlandi

Qoraqalpog‘istonda radioelektron vositalardan tegishli ruxsatnomalar rasmiylashtirmasdan foydalanayotgan shaxslar aniqlandi. Bu haqda “O‘zkomnazorat” matbuot xizmati xabar berdi. 

Maʼlum qilinishicha, 5-7-fevral kunlari “O‘zkomnazorat” inspeksiyasi hamda “EMMM” DUKning Qoraqalpog‘iston Respublikasi Elektromagnit moslashuv xizmati xodimlari tomonidan Nukus shahri hududida radiomonitoring tadbirlari o‘tkazilgan.

Unda 6 nafar fuqaro 31 ta radioelektron vosita (ratsiya)dan tegishli ruxsatnoma rasmiylashtirmasdan foydalanib kelayotgani aniqlangan.

Tadbir jarayonida fuqarolarga radioelektron vositalardan foydalanish tartibi to‘g‘risida tushuntirishlar berilib, qurilmalar faoliyati to‘xtatildi. Ulardan tegishli ruxsatnoma rasmiylashtirmasdan qayta foydalanilgan taqdirda “Maʼmuriy javobgarlik to‘g‘risida”gi kodeksning 152-moddasiga asosan maʼmuriy javobgarlik choralari ko‘rilishi haqida ogohlantirildi.