Bugun, 8-fevral kuni bloger Abror Muxtor Aliy ichki ishlar xodimlarining qonuniy talablariga bo‘ysunmaganlikda ayblanib hibsga olingani, unga nisbatan 15 sutka ma’muriy qamoq jazosi tayinlangani haqida xabar berilgan edi. “Daryo” manbasiga ko‘ra, diniy blogerning qo‘lga olinishi “ko‘cha” bolalariga qarshi o‘tkazilayotgan “Dolzarb 40 kunlik” tadbiri bilan bog‘liq bo‘lishi ham mumkin.
Bloger ijtimoiy tarmoqlardagi chiqishlaridan birida “Dolzarb 40 kunlik” tadbirlari doirasida qo‘lga olingan “Saidaziz medgorodok” laqabi bilan tanilgan Saidaziz Saidaliyev bilan yaqin ekanini aytgandi.
Ha, Saidaziz mening yaqin ukam, dedim. Uning gapiga turib bera olishini ko‘rganman. U men uchun kerakli paytda turib bergan, men ham unga kerakli paytda turib beraman, — degan edi Abror Muxtor Aliy.
Eslatib o‘tamiz, Saidaziz Saidaliyev 2023-yilning dekabr oyi boshlarida qo‘lga olingani e’lon qilingandi. U Toshkent shahar IIBB huzuridagi Tergov boshqarmasi tomonidan Jinoyat kodeksining 165-moddasi (tovlamachilik) bilan ayblanmoqda.
“Saidaziz medgorodok” laqabi bilan tanilgan 1987-yilda tug‘ilgan Saidaziz Saidaliyev sport bilan shug‘ullangan jismonan baquvvat bir nechta shaxsni o‘z atrofiga jalb qilib, bir nechta jinoyatlarni sodir etgan. Xususan, qarzdorlik va boshqa muammolari bo‘lgan shaxslarning muammolarini qonunni chetlab o‘tgan holda hal qilib berish evaziga moddiy jihatdan manfaatdor bo‘lish, tahdidlar yo‘li bilan pul mablag‘larini noqonuniy qo‘lga kiritish, bezorilik va tamagirlik holatlari shular jumlasidan.
Jinoyat ishi doirasida gumon qilinuvchi Saidaziz Saidaliyev va boshqa bir nechta shaxslarga nisbatan qamoqqa olish tarzidagi ehtiyot chorasi qo‘llangan. Tergov davom etmoqda.
Izoh (0)