Sirdaryo viloyatida ariqlarni betonlashtirish jarayonida tabiatga 232 million so‘m zarar yetkazildi. Bu haqda Ekologiya vazirligi axborot xizmati xabar berdi.
Ma’lum qilinishicha, Sirdaryo viloyatida olib borilgan o‘rganish ishlari davomida Guliston tumani “Ishonch” SIU hududida ariqlarni betonlashtirish uchun daraxtlarni kesish yuzasidan murojaat qilingan. Sirdaryo viloyati Ekologiya boshqarmasi esa daraxtlarni kesishga ruxsat bermagan. Bugungi kunda ushbu manzarali daraxtlarga hech qanday shikast yetkazilmagan.
Ammo boshqa bir hududda daraxtlar ruxsatsiz kesilgan. Ya’ni Guliston shahri va Mirzaobod tumani hududidan oqib o‘tuvchi kanal va ariqlarni betonlashtirish jarayonida 20 tupdan ortiq daraxt ildizi bilan qo‘porib tashlangan. Natijada tabiatga 232 million 560 ming so‘m miqdorida zarar yetkazilgan. Holat yuzasidan to‘plangan hujjatlar qonuniy chora ko‘rish maqsadida viloyat prokuraturasiga yuborilgan. Hozirda holat bo‘yicha tegishli tartibda surishtiruv ishlari olib borilmoqda.
Qolgan hududlarda ham o‘rganish ishlari davom ettirilib, daraxtlar beton qoplamalardan tozalanmoqda. Yuqoridagi holatlar yuzasidan Ekologiya, atrof-muhitni muhofaza qilish va iqlim o‘zgarishi vaziri tomonidan Suv xo‘jaligi vazirligi va hokimliklarga ogohlantirish xatlari va taqdimnomalar kiritilmoqda.
Izoh (0)