Sirdaryo tumanida daraxtlarning noqonuniy ravishda kesilishi oqibatida 273 million so‘m zarar yetkazildi. Bu haqda Sirdaryo viloyati ekologiya boshqarmasi axborot xizmati xabar berdi.
Ma’lum qilinishicha, 24-yanvar kuni Sirdaryo tumani “Navro‘z” MFY hududida joylashgan “Sirdaryo bog‘lari” fermer xo‘jaligi dala yer maydoni chetida fuqaro hech qanday ruxsatnomasiz noqonuniy ravishda 14 dona manzarali daraxtni kesgan. U kesilgan daraxtlarni “Belarus” rusumli traktor tirkamasiga ortayotgan vaqtda davlat inspektorlari tomonidan voqea joyida qo‘lga olingan.
Vazirlar Mahkamasining 2022-yil 22-fevraldagi 464-sonli qarorining 4-ilovasi asosida o‘lchanib hisoblanganda uch turdagi jami 14 dona manzarali daraxtni kesib tashlash natijasida o‘simlik dunyosiga yetkazilgan zarar 273 million 360 ming so‘m hisoblangan.
Holat yuzasidan to‘plangan hujjatlar viloyat prokuraturasiga yuborilgan.
Avvalroq Xorazm viloyati Shovot tumanida daraxtlar kesib, yoqib yuborilishi oqibatida 756 million so‘m zarar yetkazilgani to‘g‘risida xabar berilgandi. Shuningdek, Sirdaryoda ariqlarni betonlashtirish jarayonida tabiatga 232 million so‘m zarar yetkazilgan edi.
Izoh (0)