Тошкентда собиқ ҳарбий шаҳарча ҳудудидаги яшил майдон хавф остида қолаётгани айтилган хабарларга муносабат билдирилди

Миробод тумани ҳокимлиги ижтимоий тармоқларда тумандаги катта яшил майдон йўқ қилиниш хавфи остида қолаётгани айтилган хабарларга муносабат билдирди.

Қайд этилишича, Facebook ижтимоий тармоғида тарқалган мурожаатдаги ҳудуд – 7-сонли ҳарбий шаҳарча Миробод тумани Авлиё ота кўчаси 124-уй манзилида жойлашган.

Давлат активларини бошқариш агентлиги Тошкент шаҳар бошқармаси томонидан ушбу ҳудуд 2021 йил 10 декабрдаги 21-сонли давлат ордерига асосан New Car Land масъулияти чекланган жамият номига ўтказилган.

Бугунги кунда иккита МЧЖ, яъни New Car Land масъулияти чекланган жамияти ҳамда ETALON-Construction МЧЖлар ушбу ер майдонига эгалик қилиб келмоқда.

“Шу кунгача тегишли ташкилотларга ушбу ер майдонида қурилиш ишларини амалга ошириш бўйича бирорта мурожаат келиб тушмаган ҳамда туман атроф-муҳитни муҳофаза қилиш, экология ва иқлим ўзгариши бўлинмаси томонидан ҳудуддаги дарахтлар муҳофазаси бўйича чоралар кўрилиб, масъулларга огоҳлантириш берилган”, — дейилади муносабатда.

Аввалроқ Қашқадарёда канал қирғоғини реконструкция қилиш вақтида 150 та дарахт қўпориб ташлангани, Хоразм вилояти Шовот туманида дарахтлар кесиб, ёқиб юборилиши оқибатида 756 миллион сўм зарар етказилгани тўғрисида хабар берилганди. Шунингдек, Сирдарёда ариқларни бетонлаштириш жараёнида табиатга 232 миллион сўм зарар етказилган эди.