Ayni vaqtda Shavkat Mirziyoyev raisligida ijtimoiy sohadagi ustuvor vazifalarga bag‘ishlangan yig‘ilish bo‘lib o‘tmoqda. Yig‘ilishda har yili bog‘cha tarbiyachilarining o‘rtacha bor-yo‘g‘i 9 foizi malaka oshirayotganiga eʼtiroz bildirildi.
Bundan tashqari, 12 mingta oilaviy bog‘chada davlat taʼlim standartidagi o‘quv-metodik materiallar yetarli emas.
Maktabgacha taʼlim agentligiga bog‘cha mudiraligiga nomzodlarni saralash, ularni lavozimga tayinlash tizimini ishlab chiqish; barcha bog‘chalarda ovqat, davomat, badal puli kabi jarayonlarni to‘liq raqamlashtirish; 250 ta davlat bog‘chasida taʼlim va tarbiya sifatini xalqaro standartlar asosida baholash tizimini joriy qilish topshirildi.
Bog‘chalarni milliy qadriyatlarimizga mos yagona standartlar asosida o‘quv-metodik materiallar bilan taʼminlash zarurligi taʼkidlandi.
Shuningdek, ta’kidlanishicha, 2024-yilda maktablar va maktab taʼlimiga 46 trillion so‘mdan ziyod mablag‘ ajratish rejalashtirilgan. Lekin matematika, o‘qish va tabiiy fanlar bo‘yicha o‘tkazilgan 2022-yilgi PISA xalqaro dasturi natijalari sohada qilinadigan ishlar hali ko‘pligini aniq ko‘rsatdi.
Yoki 500 ta maktabda yangi baholash tizimi joriy qilinib, haqiqiy bilim qay darajada ekani aniqlandi. Hozirda 1—11-sinflarda xorijiy tilga ajratilgan 984 soat doirasida o‘quvchilarni yarmi ham B1 darajaga ega bo‘la olmayapti. Shuningdek, ayrim hududlardagi malaka oshirish markazlarining faoliyati ko‘rinmayapti.
Izoh (0)