Rossiya qo‘shinlari bir sutkada 810 nafar harbiysini yo‘qotdi — Ukraina Qurolli kuchlari

Ukraina Qurolli kuchlari bosh shtabi bir sutka ichida Rossiya qo‘shinlari 810 kishini yo‘qotganini ma’lum qildi. Bu haqda BBC xabar berdi.

“Tavriya” tezkor-strategik kuchlar guruhi qo‘mondoni Aleksandr Tarnavskiy tegishli ma’lumot bilan bo‘lishdi. 3–4-fevral kunlari ukrainalik harbiylar Rossiyaning 170 ta har xil turdagi dronini zararsizlantirdi yoki yo‘q qildi. 

Rossiyaliklarning ushbu yo‘nalishdagi umumiy yo‘qotishlari dronlarni hisobga olmaganda kuniga 332 kishi va 24 ta harbiy texnikani tashkil etgan.

“Ukraina Qurolli kuchlari Rossiya armiyasining Avdeyevkani egallashga urinishlarini tiyishda davom etmoqda”, — deyiladi xabarda.

Umuman olganda, Rossiyaning so‘nggi 24 soat ichida yo‘qotishlari 810 kishini, 31 artilleriya tizimini va 2 ta tankni tashkil etgan. 3-fevral kuni 66 ta to‘qnashuv bo‘lib o‘tgan, ruslar Ukraina Qurolli kuchlari pozitsiyalari va aholi punktlariga 2 ta raketa, 65 ta havo zarbasi va 53 ta raketa tizimlaridan zarba bergan.

3-fevral kuni Ukraina rus qo‘shinlarining 12 ta nishoniga havo hujumlarini amalga oshirgan. Ukraina havo hujumidan mudofaa kuchlari va vositalari 1 ta X-59 zenit raketasini, 10 ta “Shahed-136/131” hujumchi dronlari, 3 ta razvedkachi dronlarini yo‘q qilgan.