Rossiya qo‘shinlari nazoratidagi Lisichansk shahri o‘qqa tutilishi oqibatida 28 kishi halok bo‘ldi. Bu haqda o‘zini o‘zi mustaqil deb e’lon qilgan Lugansk xalq Respublikasi (LXR) rahbari Leonid Pasechnik xabar berdi. Ma’lumotni Rossiya FVV tasdiqladi.
LXR vakillarining so‘zlariga ko‘ra, Ukraina harbiylari tomonidan o‘qqa tutilishi oqibatida 3-fevral kuni novvoyxona binosi vayron bo‘lgan. Vayronalar ostida 40 ga yaqin odam bo‘lishi mumkinligi aytilmoqda.
“Rossiya Federatsiyasi Favqulodda vaziyatlar vazirligi xodimlari tomonidan 10 kishi qutqarib olindi. Afsuski, 28 kishi, jumladan, bir bola halok bo‘ldi”, — deyiladi xabarda.
Lisichanskdagi novvoyxona binosi qulagan joyda qidiruv-qutqaruv ishlari davom etmoqda. Leonid Pasechnik 4-fevralni Lisichanskning o‘qqa tutilishi qurbonlari xotirasiga motam kuni deb e’lon qildi.
Rossiya Tashqi ishlar vazirligi rasmiy vakili Mariya Zaxarovaning aytishicha, Moskva tegishli xalqaro tashkilotlardan Kiyevning Lisichanskga hujumini qoralashini kutmoqda.
“Rossiya bu haqda xalqaro tashkilotlarga xabar beradi. Biz tegishli xalqaro tashkilotlardan tezda so‘zsiz qoralashni kutamiz”, — deydi u.
Ukraina rasmiylari Lisichansk o‘qqa tutilgani haqidagi xabarlarga hozircha izoh bermagan. Rossiya nazoratidagi Lugansk axborot markazi Ukraina novvoyxonani AQSH tomonidan yetkazib berilgan HIMARS artilleriya raketa tizimi yordamida o‘qqa tutgani haqida xabar berdi.
Bu davo nimaga asoslangani noma’lum bo‘lsa-da, mazkur ma’lumotni tasdiqlash imkoni bo‘lmagan.
Portlash joyidan olingan fotosuratlarda binoda “Restoran Adriatik” yozuvi bor. Lisichanskda haqiqatan ham Moskovskaya ko‘chasi, 167a-uyda joylashgan ukrain oshxonasi mavjud. Mahalliy aholi ham ijtimoiy tarmoqlarda restoran binosi hujumga uchragani haqida yozmoqda.
Izoh (0)