Chili markazidagi Valparaiso hududida sodir bo‘lgan o‘rmon yong‘inlarida 51 kishi halok bo‘ldi. Bu haqda mamlakat prezidenti Gabriel Borichga tayanib, El Mundo xabar berdi.
Valparaisoda 2-fevraldan beri favqulodda holat joriy qilingan. Chili rasmiylariga ko‘ra, yong‘in maydoni 40 ming gektardan oshadi.
“Menda hozirgacha yong‘inlar oqibatida 45 kishi halok bo‘lgani va yana 6 kishi kuyish natijasida shifoxonalarda vafot etgani haqida tasdiqlangan ma’lumot bor. Fojia ko‘lamini inobatga olsak, yaqin soatlarda qurbonlar soni albatta ortib boradi”, — deydi Chili prezidenti matbuot anjumanida.
Gabriel Borich Chili aholisini rasmiylardan xabar olish bilanoq evakuatsiyani amalga oshirishga chaqirdi.
“Yong‘in juda tez tarqalmoqda va ob-havo sharoiti yong‘inlarga qarshi kurashni sezilarli darajada murakkablashtirdi: yuqori harorat, kuchli shamol tezligi esa soatiga 60 kilometrgacha”, — qo‘shimcha qildi janob Borich.
Ayni paytda Valparaisoda kamida to‘rtta yirik yong‘in bor: ikkitasi qirg‘oq bo‘yidagi Vinya-del-Mar shahrida hamda yana ikkitasi Kilpue va Kilota shaharlarida. Chili Ichki ishlar vaziri o‘rinbosari Manuel Monsalvening so‘zlariga ko‘ra, yong‘inlar oqibatida 3 mingdan 6 minggacha uy zarar ko‘rgan.
2-fevralda boshlangan yong‘in so‘nggi vaqtlardagi eng halokatlilardan biriga aylandi. Vafot etganlar soni 2023-yilga nisbatan ikki baravar ko‘paydi, o‘shanda yong‘in oqibatida 27 kishi halok bo‘lgan edi.
Izoh (0)