Keniya poytaxti Nayrobida gaz portlashi va kuchli yong‘in sodir bo‘ldi. Hodisa oqibatida kamida uch kishi, jumladan, bir bola halok bo‘ldi, 271 kishi jarohatlandi.
2-fevralga o‘tar kechasi Embakasi hududidagi sanoat maydonchasida gaz portlagan. Mahalliy hokimiyat maʼlumotlariga ko‘ra, hodisa vaqtida korxonada gaz ballonlari to‘ldirilayotgan bo‘lgan. Portlashdan keyin yong‘in boshlanib, sanoat binosiga jiddiy zarar yetkazgan va yaqin atrofdagi uylarga o‘tgan. Hozirda hodisaning aniq sabablari o‘rganilmoqda.
Ayni damda Keniya poytaxti ustidan ulkan tutun ko‘tarilmoqda. Yong‘in sodir bo‘lgan bino yaqinida yashovchi ko‘plab fuqarolar uyga qaytishdan bosh tortmoqda: ular quyuq tutunda bo‘g‘ilib qolishdan va yong‘in kengroq tarqalishidan xavotirda.
O‘t o‘chiruvchilar yong‘inga qarshi kurashda davom etmoqda. Korxona joylashgan hudud politsiya tomonidan o‘rab olingan. Jabrlanganlar soni, so‘nggi ma’lumotlarga ko‘ra, 271 kishiga yetdi, ular yaqin atrofdagi bir nechta shifoxonalarga yetkazildi.
Vayronkor yong‘indan so‘ng Keniya huquq-tartibot idoralarida aholi turar joylari o‘rtasida, fuqarolarning uylariga yaqin joyda xavfli ishlab chiqarish obyektini qurishga ruxsat bergan mahalliy amaldorlar haqida savollar paydo bo‘ldi. Fojia ortidan korrupsiyaga oid tergov boshlanishi ham mumkin.
Izoh (0)