Чили марказидаги Вальпараисо ҳудудида содир бўлган ўрмон ёнғинларида 51 киши ҳалок бўлди. Бу ҳақда мамлакат президенти Габриэль Боричга таяниб, El Mundо хабар берди.
Вальпараисода 2 февралдан бери фавқулодда ҳолат жорий қилинган. Чили расмийларига кўра, ёнғин майдони 40 минг гектардан ошади.
“Менда ҳозиргача ёнғинлар оқибатида 45 киши ҳалок бўлгани ва яна 6 киши куйиш натижасида шифохоналарда вафот этгани ҳақида тасдиқланган маълумот бор. Фожиа кўламини инобатга олсак, яқин соатларда қурбонлар сони албатта ортиб боради”, — дейди Чили президенти матбуот анжуманида.
Габриэль Борич Чили аҳолисини расмийлардан хабар олиш биланоқ эвакуацияни амалга оширишга чақирди.
“Ёнғин жуда тез тарқалмоқда ва об-ҳаво шароити ёнғинларга қарши курашни сезиларли даражада мураккаблаштирди: юқори ҳарорат, кучли шамол тезлиги эса соатига 60 километргача”, — қўшимча қилди жаноб Борич.
Айни пайтда Вальпараисода камида тўртта йирик ёнғин бор: иккитаси қирғоқ бўйидаги Винья-дел-Мар шаҳрида ҳамда яна иккитаси Кильпуэ ва Килота шаҳарларида. Чили Ички ишлар вазири ўринбосари Мануэль Монсальвенинг сўзларига кўра, ёнғинлар оқибатида 3 мингдан 6 минггача уй зарар кўрган.
2 февралда бошланган ёнғин сўнгги вақтлардаги энг ҳалокатлилардан бирига айланди. Вафот этганлар сони 2023 йилга нисбатан икки баравар кўпайди, ўшанда ёнғин оқибатида 27 киши ҳалок бўлган эди.
Изоҳ (0)