Buyuk Britaniya Liviya sobiq rahbari Muammar Kaddafining bevasi Safiya Farkashga nisbatan sanksiyalarni yengillashtirdi va uning mamlakatga kirishiga qo‘yilgan taqiqni olib tashladi. Buni Britaniya hukumati saytidagi yangilangan sanksiyalar ro‘yxati tasdiqlaydi.
London tomonidan BMT Xavfsizlik Kengashining 2011-yildagi 1970-sonli rezolyutsiyasiga muvofiq, Liviya xalqiga qarshi zo‘ravonliklarda qatnashgani uchun o‘n besh liviyalik mansabdor orasida Kaddafi va uning yaqinlariga nisbatan cheklov choralari joriy etilgandi.
Britaniya hukumatiga ko‘ra, Farkash Ummon davlati pasportiga ega. Hozirda esa 71 yashar sobiq birinchi xonim Misrda yashayotgani taxmin qilinmoqda. U 2011-yildagi qo‘zg‘olonlar ortidan mamlakatni tark etgan va 2016-yil aprel oyida hukumat Kaddafi tarafdorlarini tinchlantirishga qaratilgan saʼy-harakatlari doirasida Safiya Kaddafiga Liviyaga qaytishga ruxsat bergan edi.
Maʼlumot uchun, Farkash Kaddafining Fathiya Nuri Holiddan keyingi ikkinchi xotini va sakkiz farzandidan yetti nafarining onasi. Ular 1970-yilda turmush qurishgan va Kaddafi 2011-yilda fuqarolar urushi paytida o‘ldirilgunga qadar birga yashagan.
Izoh (0)