Tinchlikni ta’minlash uchun Yevropa Ittifoqi o‘zini himoya qilishga tayyor bo‘lishi kerak. Bu haqda Yevropa Ittifoqining tashqi ishlar va xavfsizlik siyosati bo‘yicha Oliy vakili, Yevrokomissiya vitse-prezidenti Xosep Borrel ma’lum qildi.
Uning eslatishicha, Yevropa kengashi so‘nggi yig‘ilishda Ukrainaga 50 milliard yevrolik yordamning yangi paketi bo‘yicha kelishuvga erishgan. Shu bilan birga, diplomatning so‘zlariga ko‘ra, YI Kiyevga o‘q-dorilar yetkazib berish grafigidan ortda qolmoqda, ammo buni tezlashtirishga harakat qilyapti.
“Yil oxirigacha biz Ukrainaga 1 milliondan ortiq artilleriya snaryadlarini yetkazib beramiz va 60 ming ukrainalik harbiy xizmatchini tayyorlaymiz”, — deb ishontirdi Borrel.
Uning so‘zlariga ko‘ra, Yevropa Ittifoqi allaqachon Ukrainaga 28 milliard yevrodan ortiq harbiy yordam bergan.
“Bu biz qo‘llab-quvvatlashni sezilarli darajada tezlashtirganimizdan dalolat beradi. Biz bir yil ichida urushning oldingi ikki yili uchun ajratilgan mablag‘ga yaqin pulni taqdim etamiz”, — deya ta’kidladi Yevropa diplomatiyasi rahbari.
Izoh (0)