Yevropa Ittifoqi mamlakatlari mudofaa vazirlari Bryusseldagi norasmiy uchrashuvda Ukraina armiyasi uchun qo‘shimcha 20 ming askar tayyorlashga kelishib oldi, dedi Yevropa diplomatiyasi rahbari Josep Borrel matbuot anjumanida.
“Ukraina armiyasi uchun 40 ming askar tayyorlash missiyasini deyarli yakunladik. Endi biz bu raqamga yana 20 ming askar qo‘shishga kelishib oldik, shuning uchun yoz oxirigacha jami 60 ming askar tayyorlanadi”, — dedi u.
YI kengashi noyabr oyi oxirida Ukrainaga harbiy yordam missiyasi doirasida ukrainalik harbiy xizmatchilarni tayyorlash uchun 194 million yevro miqdorida qo‘shimcha mablag‘ ajratishga qaror qildi.
“Bunday yordam Yevropa Tinchlik Jamg‘armasi (EPF) orqali zarur asbob-uskunalar va materiallar, shuningdek, o‘quv faoliyatini qo‘llab-quvvatlash xizmatlari ko‘rinishida taqdim etiladi”, — deyiladi kengash bayonotida.
Ushbu qarorning maqsadi “Ukraina qurolli kuchlarining ehtiyojlaridan kelib chiqqan holda va o‘quv dasturining o‘sib borayotgan hajmi va murakkabligini hisobga olgan holda, Ukraina qurolli kuchlarining salohiyatini oshirish” ekani ta’kidlangan.
Izoh (0)