“Qirg‘izistonning uch nafar sobiq prezidentiga jinoiy ishlar qo‘zg‘atilgan” — bosh prokuror

Qirg‘iziston bosh prokurori Kurmankul Zulushev mamlakatning qaysi sobiq prezidentlariga nisbatan jinoiy ish qo‘zg‘atilganini ma’lum qildi. Bu haqda “AKIpress” xabar berdi.

Bosh prokurorga ko‘ra, Qurmanbek Bakiyevga nisbatan bir nechta jinoiy ish qo‘zg‘atilgan. Sud qarorlari bor.

“Qumtor ishi Asqar Akayevga nisbatan qo‘zg‘atilgan. Qumtor oltin koni davlatga qaytarilgach, sobiq prezidentning aybi isbotlanmagani uchun ish to‘xtatilgan”, — dedi Zulushev.

Uning maʼlumotlariga ko‘ra, Almazbek Atambayevga nisbatan sudlar tomonidan 9 ta jinoiy ish ko‘rilmoqda. 

“U kasallik tufayli boshqa davlatda. Atambayev qaytib kelgach, ish davom etadi”, — dedi bosh prokuror.

Asqar Akayev 1991-yildan 2005-yilgacha, Qurmanbek Bakiyev 2005—2010-yillarda, Almazbek Atambayev esa 2011—2017-yillarda prezidentlik qilgan.