Qirg‘iziston sobiq prezidenti Asqar Akayev pensiyaga chiqqanidan so‘ng vataniga qaytishni niyat qilmoqda. Bu haqda u Yekaterinburgdagi universitetlardan birida ma’ruza o‘qiganidan so‘ng jurnalistlarga ma’lum qildi, deb yozadi “24.kg”.
Akayev hozirda Moskva davlat universitetida (MDU) ishlaydi. 2023-yilning may oyida Qirg‘iziston sobiq rahbari va uning rafiqasi Bishkekdagi oliy o‘quv yurtlaridan birida ma’ruza o‘qishga kelgan edi.
Biroq ko‘plab talabalar uning tashrifiga keskin qarshilik ko‘rsatdi. Bir qator deputatlar va o‘qituvchilar ham qarshi chiqdi. Shundan so‘ng Qirg‘iziston Ta’lim vazirligi Akayevning Bishkek universitetlaridagi chiqishini bekor qildi.
2023-yil fevral oyida Qirg‘izistonning amaldagi rahbari Sadir Japarov Birlashgan Arab Amirliklarida Qirg‘izistonning barcha prezidentlari bilan uchrashuv o‘tkazdi. O‘shanda uchrashuvda Asqar Akayev, Qurmanbek Bakiyev, Roza Otunboyeva, Almazbek Atambayev va So‘ronbay Jeenbekov qatnashgan.
Japarov bu tadbirni barqarorlik va xalq birligi uchun muzokara o‘tkazish deb atagan.
Ma’lumot uchun, Asqar Akayev 1990-yil 27-oktabrdan 1991-yil 31-avgustgacha Qirg‘iziston SSR prezidenti, 1991-yil 31-avgustdan 2005-yil 11-aprelgacha Qirg‘iziston respublikasi prezidenti bo‘lgan. U to‘rt marta (1990, 1991, 1995, 2000) prezidentlik saylovlarida g‘alaba qozongan.
2005-yil 24-martda politsiya bilan to‘qnashuv, prezident qarorgohining o‘rab olinish va talon-tоroj qilinishi bilan kechgan xalq noroziligi natijasida Akayev maxsus xizmatlar yordamida mamlakatdan qochishga muvaffaq bo‘lgan.
Ommaviy noroziliklarga saylovlardagi soxtalashtirishlar, shaxsiy manfaatni ko‘zlab Konstitutsiyaga noqonuniy o‘zgartirish kiritishlar sabab bo‘lgan.
O‘shandan beri Akayevlar oilasi Moskvada istiqomat qiladi.
Izoh (0)