Ikki kun ichida Rossiya prezidentligiga uchinchi nomzod saylovda ishtirok etishdan bosh tortdi. Rossiya davlat axborot agentligi “RIA Novosti” xabariga ko‘ra, 31-yanvar kuni Rossiya “Ozodlik va adolat” partiyasi asoschisi, shuningdek, Rossiyaning asosiy masoni, unchalik taniqli bo‘lmagan siyosatchi Andrey Bogdanov saylovoldi poygasidan chiqdi.
31-yanvar kuni Rossiya Markaziy saylov komissiyasining majlisi oldidan Bogdanov uni qo‘llab-quvvatlash uchun to‘plangan imzo varaqalarini taqdim etdi, ammo shundan so‘ng darhol nomzodlikdan voz kechish va saylov kampaniyasida ishtirok etishdan bosh tortishi haqida bayonot yozdi.
Bogdanov siyosiy strateg sifatida tanilgan. U qayta-qayta siyosiy partiyalar yaratgan (ham o‘ng, ham so‘l qanot), ularning ba’zilari keyinchalik sotib yuborilgan. 2008-yilda u Rossiya prezidenti saylovlarida qatnashib, 1,3 foiz ovoz to‘plagan.
Bir kun avval, 30-yanvar kuni ommaviy qo‘llab-quvvatlanmagan yana bir rossiyalik siyosatchi Sergey Baburin ham xuddi shunday tarzda o‘z nomzodini qaytarib olgandi. Baburin 2018-yilda Rossiya prezidenti bo‘lishga harakat qilgan, o‘shanda u 1,05 foiz ovoz olgan.
“TASS” xabariga ko‘ra, Sergey Baburin bilan bir vaqtda Rossiya Demokratik partiyasi vakili Irina Sviridova ham saylovdan chiqdi. U xuddi Boburin singari Rossiyaning hozirgi prezidenti Vladimir Putinni qo‘llab-quvvatlashini e’lon qildi.
Hozirgacha Rossiya Markaziy saylov komissiyasi Vladimir Putindan tashqari prezidentlikka uchta nomzodni ro‘yxatga oldi: LDPRdan Leonid Slutskiy, Rossiya Kommunistik partiyasidan Nikolay Xaritonov, “Yangi xalq” partiyasidan Vladislav Davankov.
Izoh (0)